یمن میں حوثیوں کے خلاف بڑا فوجی آپریشن، 24 گھنٹوں میں 324 جنگجو ہلاک، 108 فوجی گاڑیاں تباہ کرنے کا دعویٰ، تعز سمیت متعدد محاذوں پر لڑائی جاری
یمن کی سرکاری مسلح افواج نے حوثی باغیوں کے خلاف جاری فوجی کارروائیوں میں بڑی کامیابیوں کا دعویٰ کیا ہے۔ یمنی فوج کے ترجمان کرنل ماجد النزیلی کے مطابق گزشتہ 24 گھنٹوں کے دوران مختلف کارروائیوں میں 324 حوثی جنگجو ہلاک اور 108 فوجی گاڑیاں تباہ یا ناکارہ بنا دی گئیں۔ ہلاک ہونے والوں میں متعدد فیلڈ کمانڈرز بھی شامل ہیں۔
یمنی فوج کے ترجمان نے 30 اکتوبر کو سوشل میڈیا پلیٹ فارم ایکس پر جاری بیان میں بتایا کہ حوثیوں کے خلاف ’’طلوعِ یمن‘‘ کے نام سے فوجی آپریشن جاری ہے، جس کے دوران مختلف محاذوں پر حوثی جنگجوؤں کے ٹھکانوں، کمانڈ سینٹرز، تربیتی مراکز اور عسکری تنصیبات کو نشانہ بنایا جا رہا ہے۔
مزید اپڈیٹس کیلئے وٹس ایپ چینل فالو کریں: چینل لنک
ان کے مطابق کارروائیوں میں جنگی طیاروں، ڈرونز، توپ خانے اور راکٹ لانچرز کا استعمال کیا جا رہا ہے، جبکہ حوثیوں کی نقل و حرکت محدود کرنے کے لیے ان کی رسد، فوجی گاڑیوں اور بھاری ہتھیاروں کو بھی نشانہ بنایا جا رہا ہے۔
فوجی ترجمان کے مطابق جنوب مغربی صوبے تعز میں سرکاری فوج اور اس کے اتحادی عوامی مزاحمتی گروپوں نے حوثیوں کی پیش قدمی روکنے اور ان کے دوبارہ منظم ہونے کی کوششیں ناکام بنانے کے لیے کارروائیاں تیز کر دی ہیں۔ اس دوران حوثیوں کے اجتماعات، کمک پہنچانے والے دستوں اور اہم فوجی پوزیشنوں کو فضائی حملوں اور توپ خانے سے نشانہ بنایا گیا۔
انہوں نے بتایا کہ دارالحکومت صنعاء کے مشرقی محاذوں کے علاوہ الجوف، مارب اور البیضاء کے صوبوں میں بھی فوجی کارروائیاں جاری ہیں۔ جنوبی اور جنوب مغربی محاذوں پر بھی حوثیوں کی نقل و حرکت، دفاعی ٹھکانوں اور رسدی راستوں کو نشانہ بنایا جا رہا ہے۔
مزید اپڈیٹس کیلئے وٹس ایپ چینل فالو کریں: چینل لنک
یمنی فوج کے مطابق حوثیوں کی جانب سے مختلف علاقوں میں بچھائی گئی بارودی سرنگیں اور دیسی ساختہ دھماکا خیز آلات بھی صاف کیے جا رہے ہیں تاکہ فوجی پیش قدمی کے ساتھ شہری آبادی کو ان سے لاحق خطرات سے محفوظ رکھا جا سکے۔
اسی روز یمنی فوج کے ترجمان نے کارروائیوں کے تازہ اعدادوشمار بھی جاری کیے۔ ان کے مطابق آپریشن کے تحت کارروائیوں کی تعداد بڑھ کر 1,087 ہوگئی، جبکہ تقریباً 336 حوثی جنگجوؤں اور کمانڈرز کو ہلاک یا زخمی کرنے اور 112 فوجی گاڑیوں، ہتھیاروں اور دیگر عسکری سازوسامان کو تباہ یا ناکارہ بنانے کا دعویٰ کیا گیا ہے۔
