ترک بلکند یونیورسٹی آف نیشنل نینو ٹیکنالوجی ریسرچ سینٹر کے سائنسدانوں نے کورونا وائرس کے ٹیسٹ کا ایک نیا طریقہ دریافت کر لیا ہے۔ نینو ٹیکنالوجی کے اس ٹیسٹ میں کورونا ٹیسٹ کا نتیجہ صرف 10 سیکنڈ میں سامنے آ جاتا ہے۔ نتیجے کی درستگی کی شرح 95 فیصد ہے۔
جدید ٹیکنالوجی کو ڈائیگنو ویر کا نام دیا گیا ہے اور یہ ٹیسٹ پی سی آر ٹیسٹس کا متبادل ہو گا۔
یونیورسٹی کے سائنسدان عبداللہ اتالر نے کہا ہے کہ اگر کسی شخص میں کورونا وائرس موجود ہو گا تو اس ٹیسٹ کے ذریعے صرف 10 سیکنڈ میں کورونا کی تصدیق ممکن ہو سکے گی۔ اگر کسی شخص میں کورونا وائرس نہیں ہے تو ٹیسٹ کا نتیجہ آنے میں کچھ وقت لگے گا کیونکہ یہ ٹیکنالوجی مکمل چھان بین کے بعد رزلٹ سامنے لاتی ہے۔
انہوں نے کہا کہ اس ٹیکنالوجی سے کورونا وائرس کو پھیلنے سے روکنے میں مدد ملے گی کیونکہ دس سیکنڈ میں رزلٹ آنے کے بعد متاثرہ شخص کو قرنطینہ میں فوری منتقل کیا جا سکے گا۔ یہ ٹیکنالوجی کورونا وائرس کے علاوہ کسی بھی دوسری وبا کے لئے بھی استعمال کی جا سکتی ہے۔
یونیورسٹی کے ایک اور سائنسدان بلند اورتاج نے کہا کہ ڈائیگنوسٹک سسٹم کی کِٹ سات ماہ کے لئے قابل استعمال ہے۔
یونیورسٹی کا کہنا ہے کہ اس ٹیکنالوجی کے فیز ٹو کے تجربات کامیاب ہوئے ہیں۔ جلد ہی یہ ٹیکنالوجی لیبارٹریز اور اسپتالوں کو فراہم کر دی جائے گی۔
انہوں نے کہا کہ پی سی آر ٹیسٹ کے نتائج میں غلطی کا مارجن بہت زیادہ ہے اور اس کا نتیجہ آنے میں دو سے تین دن لگ جاتے ہیں۔
انہوں نے کہا کہ اس ٹیکنالوجی کی کمرشل پیداوار جلد ہی شروع ہو جائے گی اور اسے دیگر ممالک کو بھی برآمد کیا جا سکتا ہے۔
