تُرکی نے دنیا کے دیگر ممالک کے ساتھ ساتھ پاکستان سے بھی فضائی آپریشن بحال کرنے کا اعلان کر دیا ہے۔ پاکستان میں تُرک سفیر مصطفیٰ یرداکل نے اپنے ٹوئٹر پیغام میں کہا ہے ٹرکش ایئر لائنز 2 جولائی سے پاکستان سے اپنا فضائی آپریشن بحال کر دے گی۔ ابتدائی طور پر کراچی، لاہور اور اسلام آباد سے پروازیں شروع کی جا رہی ہیں۔ منگل، جمعرات، جمعہ اور ہفتے کو ٹرکش ایئر لائنز کی پروازیں شروع ہو رہی ہیں۔ ان تینوں شہروں سے ہفتے میں ایک ایک پرواز ترکی کیلئے روانہ ہو گی۔
واضح رہے کہ تُرکی نے بیشتر ممالک کے ساتھ اپنا فضائی آپریشن شروع کر دیا ہے۔ یورپ کے کچھ ممالک سے سیاح ترکی پہنچ رہے ہیں۔ حکومت نے ہیلتھ ٹورازم سرٹفیکٹس جاری کئے ہیں جس کے تحت ہوٹلز کو حکومت کی طرف سے فراہم کی گئیں 131 ہدایات پر سختی سے عمل کرنے کا پابند کیا گیا ہے تاکہ سیاحوں کی صحت پر کسی قسم کا سمجھوتہ نہ کیا جا سکے۔
