ترکی میں فیس ٹو فیس تعلیمی سرگرمیاں 15 فروری سے کھولنے کا فیصلہ کیا گیا ہے۔ ترک وزیر تعلیم ضیا سلجوق نے کہا کہ کورونا وائرس کی موجودہ صورتحال کو دیکھتے ہوئے فیصلہ کیا گیا ہے کہ فروری کے وسط میں اسکول اور کالجز کو کھول دیا جائے گا۔
اسکول کھولنے سے 10 روز قبل ایک اعلیٰ سطح کا اجلاس بلایا جائے گا جس میں والدین اور اساتذہ سے مشاورت کی جائے گی۔ حکومت کے کورونا وائرس سائنٹفک ایڈوائزری بورڈ نے بھی وزارت تعلیم کو اسکول 15 فروری سے کھولنے کی اجازت دے دی ہے تاہم اب دیکھنا یہ ہے کہ کون سے شہروں میں ابتدائی طور پر اسکول کھولے جائیں گے۔
ترک حکومت آن لائن تعلیمی سرگرمیوں کو خیر باد کہہ کر اسکول اور کالجز کھولنا چاہتی ہے تاکہ طالب علم دوبارہ معمول کے مطابق اسکول حاضر ہو کر کلاسز اٹینڈ کریں۔
واضح رہے کہ کورونا وائرس کی دوسری لہر کے بعد ترکی میں 20 نومبر سے اسکول، کالجز اور یونیورسٹیز بند کر دی گئیں تھیں۔ حکومت نے فیصلہ کیا تھا کہ 4 جنوری سے تمام تعلیمی ادارے کھول دیئے جائیں گے لیکن کورونا کیسز بڑھنے سے اب فیصلہ کیا گیا ہے کہ 15 فروری سے تعلیمی سرگرمیاں دوبارہ شروع کی جائیں۔
