جرمنی کی وزیر دفاع اینرگریت کریمپ کیرن بائیور نے ترک وزیر دفاع ہلوسی آکار سے ملاقات کرتے ہوئے کہا ہے کہ ترکی نیٹو کا اہم اتحادی ہے۔
انہوں نے جرمن وزارت دفاع میں ترک وزیر دفاع کا استقبال کیا۔ دونوں وزرائے دفاع نے باہمی دفاعی تعاون، انٹرنیشنل سیکیورٹی کے معاملات سمیت مشرقی بحیرہ روم میں حالیہ صورتحال پر بات چیت کی۔
جرمن وزارت دفاع نے کیرن بائیور کی ایک تصویر جاری کی ہے جس میں وہ جرمنی کی تاریخی عمارت بینڈلر بلاک میں ترک وزیر دفاع کا استقبال کر رہی ہیں۔
جرمن وزیر دفاع نے کہا کہ ترکی نیٹو کا ایک اہم اتحادی ہے اور رہے گا۔ پیچیدہ معاملات پر بات چیت آج کے ایجنڈے میں شامل ہے۔
دونوں رہنماوْں کے درمیان دہشت گردی کے خلاف جنگ، افغانستان اور عراق میں نیٹو کے مشنز، بحیرہ اسود اور مشرقی بحیرہ روم کے معاملات پر مذاکرات کئے۔
ترک وزیر دفاع کا دورہ جرمنی ایک ایسے وقت میں ہوا جب ترکی اور یونان میں مشرقی بحیرہ روم کے قدرتی وسائل پر مذاکرات شروع ہو چکے ہیں۔ ترکی اور یونان میں اختلافات ختم کرنے کے لئے جرمنی نے کئی اہم اقدامات کئے تاکہ دونوں ملکوں کے معاملات بات چیت کے ذریعے حل کئے جا سکیں
