نائب وزیراعظم و وزیر خارجہ پاکستان سینیٹر محمد اسحاق ڈار اور سنگاپور کے وزیر خارجہ ڈاکٹر ویویان بالاکرشنن کے درمیان اسلام آباد میں وزارتِ خارجہ میں وفود کی سطح پر مذاکرات ہوئے، جن میں پاکستان اور سنگاپور کے تعلقات کو مزید وسعت دینے اور اقتصادی تعاون کے نئے مواقع تلاش کرنے پر تفصیلی تبادلہ خیال کیا گیا۔
مذاکرات میں تجارت اور سرمایہ کاری کے فروغ، زراعت، غذائی تحفظ اور علاقائی روابط کو مضبوط بنانے پر خصوصی توجہ دی گئی۔ دونوں ممالک نے سیاحت اور کاروباری تبادلوں میں اضافے کے امکانات کا بھی جائزہ لیا۔
تعلیم، فنی تربیت، قدرتی آفات سے نمٹنے اور انفارمیشن ٹیکنالوجی کے شعبوں میں تعاون بڑھانے پر بھی بات چیت ہوئی۔ سنگاپور کے وزیر خارجہ ڈاکٹر ویویان بالاکرشنن نے پاکستان میں ماحول دوست سرمایہ کاری کے فروغ کے لیے کاربن مارکیٹس کی صلاحیت کو اجاگر کیا اور اس شعبے میں سرمایہ کاری کے امکانات پر روشنی ڈالی۔
اسحاق ڈار نے باہمی تعاون کو عملی شکل دینے کے لیے مضبوط ادارہ جاتی نظام، مستقل رابطوں اور طے شدہ امور پر باقاعدہ پیش رفت کی ضرورت پر زور دیا۔
دونوں وزرائے خارجہ نے علاقائی اور عالمی صورتحال پر بھی تبادلہ خیال کیا۔ سنگاپور کے وزیر خارجہ نے خطے میں مذاکرات اور سفارت کاری کے فروغ کے لیے پاکستان کی مسلسل کوششوں اور علاقائی امن و استحکام میں اس کے کردار کو سراہا۔
مذاکرات میں کثیرالجہتی تعاون کی اہمیت بھی زیرِ بحث آئی۔ پاکستان اس وقت شنگھائی تعاون تنظیم (ایس سی او) کی صدارت کر رہا ہے، جبکہ سنگاپور 2027 میں جنوب مشرقی ایشیائی ممالک کی تنظیم (آسیان) کی صدارت سنبھالے گا۔ دونوں وزرائے خارجہ نے مشترکہ چیلنجز سے نمٹنے، علاقائی امن اور خوشحالی کے فروغ کے لیے کثیرالجہتی فورمز پر تعاون کی اہمیت پر زور دیا۔
اس کے علاوہ آسیان کے ساتھ پاکستان کے روابط مزید مضبوط بنانے اور علاقائی تعاون میں پاکستان کی شمولیت بڑھانے کے امکانات پر بھی گفتگو کی گئی۔
