روس کے سفیر البرٹ خوروف نے قازان میں منعقد ہونے والی دوسری روس پاکستان بین الاقوامی کانفرنس کے شرکاء سے ویڈیو خطاب کیا۔ یہ کانفرنس 17ویں بین الاقوامی اقتصادی فورم روس اسلامی دنیا قازان فورم کے موقع پر منعقد ہوئی۔
روسی سفیر نے کہا کہ ماسکو اور اسلام آباد بین الاقوامی تعلقات کے نظام میں جاری بنیادی تبدیلی کے فعال شرکاء ہیں، اور اس نئے عالمی منظرنامے میں گریٹر یوریشیا میں روس اور پاکستان جیسے ذمہ دار اور بااثر ممالک کے درمیان تعاون کو مزید مضبوط بنانے کے علاوہ کوئی متبادل موجود نہیں۔
البرٹ پی خوروف نے اپنے خطاب میں کہا کہ دونوں ممالک کا مشترکہ مقصد عالمی سطح پر بڑھتی ہوئی کشیدگی کو روکنا ہے، خصوصاً مشرق وسطیٰ میں امن و استحکام کو یقینی بنانا ہے۔ انہوں نے اس بات پر زور دیا کہ بین الاقوامی امور میں اقوام متحدہ کے مرکزی کردار کو بحال کرنا ضروری ہے تاکہ دنیا کو پائیدار امن کی طرف لے جایا جا سکے۔
انہوں نے مزید کہا کہ روس کی جانب سے پیش کیا گیا "گریٹر یوریشین پارٹنرشپ” کا تصور نہ صرف سیاسی اور معاشی تعاون کو فروغ دیتا ہے بلکہ سلامتی کے شعبے میں بھی مشترکہ تعاون کو مضبوط کرتا ہے۔
روسی سفیر کے مطابق روس اور پاکستان کے تعلقات ایک نئی اور بہتر سطح پر پہنچ چکے ہیں، اور دونوں ممالک کے درمیان دو طرفہ روابط میں نمایاں اضافہ ہوا ہے۔ اس میں پارلیمانی سطح پر روابط، اور داخلہ امور، دفاع، قومی سلامتی، معیشت اور ثقافت جیسے اہم شعبوں میں تعاون شامل ہے۔
یہ بین الاقوامی کانفرنس قازان فیڈرل یونیورسٹی اور فیڈرل اردو یونیورسٹی آف آرٹس، سائنسز اینڈ ٹیکنالوجی کے اشتراک سے منعقد کی گئی، جس میں NUST اور CAPS پاکستان نے بھی شراکت کی۔
کانفرنس میں پاکستان بھر سے 20 سے زائد محققین نے شرکت کی، جو اسلام آباد، کراچی، لاہور، راولپنڈی اور سرگودھا سمیت مختلف شہروں کی جامعات اور تحقیقی اداروں کی نمائندگی کر رہے تھے۔
