ترکی میں پاکستان کے سفیر محمد سجاد قاضی نے انقرہ میں تُرک سرکاری نیوز ایجنسی اینا ڈولو کے ہیڈ آفس کا دورہ کیا۔ ایجنسی کے ایڈیٹر انچیف متین متان اولو نے پاکستانی سفیر کا استقبال کیا۔ اس موقع پر انہوں نے پاکستان اور ترکی کے تعلقات سمیت کشمیر پر ہونے والی پیشرفت پر بھی بات چیت کی۔
پاکستانی سفیر نے اینا ڈولو نیوز ایجنسی سے بات کرتے ہوئے کہا کہ بھارت کے زیر تسلط کشمیر میں ہزاروں بھارتی شہریوں کو رہائش کی اجازت دی جا رہی ہے۔ کشمیر میں ایک بہت بڑا انسانی المیہ جنم لے رہا ہے۔ انہوں نے کہا کہ اسرائیل کی طرز پر کشمیر میں غیر کشمیریوں کو آباد کیا جا رہا ہے جو کہ اقوام متحدہ کی قرار دادوں کی کھلم کھلا خلاف ورزی ہے۔
پاکستانی سفیر نے تُرک حکومت اور خاص طور پر اینا ڈولو نیوز ایجنسی کا شکریہ ادا کیا جو کشمیر کے معاملے پر پاکستانی موقف کی تائید کر رہے ہیں۔
اینا ڈولو نیوز ایجنسی کے ایڈیٹر انچیف نے کہا کہ ان کا ادارہ ترکی اور عالمی برادری کو کشمیر سمیت دیگر تنازعات پر اپ ڈیٹ کرتا رہے گا اور مسلم دنیا کو درپیش چیلنجز اور بحرانوں پر اپنی خصوصی نشریات جاری رکھے گا۔
انہوں نے کہا کہ کشمیر کا معاملہ دنیا بھر کے میڈیا میں سرگرم ہے اور کوئی نیوز چینل ایسا نہیں ہے جو کشمیر میں ہونے والے بھارتی ظلم و بربریت کی خبریں نہ دے رہے ہوں۔ کشمیر پچھلے 70 برسوں سے پاکستان اور بھارت کے درمیان ایک تنازعہ بنا ہوا ہے۔ بھارت کشمیر پر اقوام متحدہ کی قرار دادوں پر عمل نہیں کر رہا ہے۔ ایک طرف بھارت نے کشمیر کی خصوصی حیثیت ختم کر دی اور دوسری طرف بھارتی فوج کشمیریوں پر ظلم و ستم کے پہاڑ توڑ رہی ہے۔
