Sehar Naseer 
6 فروری کے زلزلہ متاثرین کے لیے 3 ہزار 5 سو موسم سرما کے خیموں سمیت امدادی سامان لے جانے والا پاک بحریہ کا جہاز مارچ کے پہلے ہفتے میں ترکیہ کے لیے روانہ ہوگا۔
پاکستان میں ترکیہ کے سفیر مہمت پچاجی کا کہنا ہے کہ پاکستان نیوی کا ایک جہاز مارچ کے پہلے ہفتے میں کراچی بندرگاہ سے سفر شروع کرئے گا اور 13 دنوں میں ترکیہ-مرسین بندرگاہ پہنچے گا۔
دارالحکومت اسلام آباد میں ترک سفارت خانے میں صحافیوں کو متاثرہ علاقوں میں زلزلے کے بعد کی صورتحال پر بریفنگ دیتے ہوئے ترک سفیر کا کہنا تھا کہ پاکستان کے وزیر اعظم شہباز شریف کی ہدایت پر فضائی اور روڈ ویز کے علاوہ ایک میری ٹائم پل بھی قائم کیا جا رہا ہے۔
وزیر اعظم پاکستان پہلے ہی اعلان کر چکے ہیں کہ پاکستان رواں ماہ کے آخر تک ترکیہ کو موسم سرما میں 1 لاکھ خیمے فراہم کرے گا۔
ترک سفیر کا کہنا تھا کہ ترکیہ زلزلے میں 41 ہزار سے زائد افراد اپنی جان کی بازی ہار چکے ہیں اور 1 لاکھ سے زائد افراد زخمی حالت میں زیرعلاج ہیں۔
ڈھائی لاکھ سے زائد سرچ اور ریسکیو اہلکار اس وقت ترک ڈیزاسٹر اینڈ ایمرجنسی مینجمنٹ اتھارٹی کے ساتھ مل کر کا م کر رہے ہیں۔
اسکے علاوہ، انہوں نے کہا کہ پاکستان سمیت دنیا کے مختلف حصوں سے 3 ہزار سے زائد غیر ملکی اہلکار بھی بچاؤ اور امدادی سرگرمیوں میں مصروف ہیں۔
انقرہ کی جانب سے بین الاقوامی امداد کی اپیل پر پاکستان کی حکومت اور عوام کے "فوری” ردعمل کی تعریف کرتے ہوئے، سفیر نے کہا کہ یہ قدم ترک عوام کے لیے "بہت معنی رکھتا ہے”۔
انہوں نے مزید کہا کہ پاکستان کی نیشنل ڈیزاسٹر اینڈ منیجمنٹ اتھارٹی نے تباہی کے پہلے دن سے اب تک تقریباً 4 ہزار موسم سرما کے خیمے اور 8 ہزار سے زیادہ کمبل ترکیہ کو بھیجے ہیں۔
مزید 3 ہزار موسم سرما کے خیمے اور 25 ہزار کمبل بذریعہ سڑک ترکیہ روانہ کیے گئے ہیں۔ یہ قافلہ 23 فروری کو ترکیہ کے صوبہ حطائے پہنچنے والا ہے، جو کہ سب سے زیادہ متاثرہ علاقوں میں سے ایک ہے۔
انہوں نے مزید کہا کہ اگلے دو ہفتوں میں چارٹرڈ کارگو پروازوں کے ذریعے 4 ہزار سے زائد موسم سرما کے خیمے بھی ترکیہ بھیجے جائیں گے۔
مزید یہ کہ پاکستانی خیراتی ادارے بشمول پاکستان ریڈ کریسنٹ اور یونیورسٹیاں بھی ترک سفارت خانے اور قونصل خانوں کے ساتھ رابطے میں ہیں اور زلزلہ زدگان کے لیے ادویات، خوراک، طبی آلات اور دیگر امدادی سامان فراہم کر رہی ہیں۔
ہم اپنے پاکستانی بھائیوں اور بہنوں کی دعاؤں اور اپنے ملک کی صحت یابی کے لیے نیک خواہشات پر ان کا شکریہ ادا کرتے ہیں۔ ہمیں یقین ہے کہ ہم ان کے انمول تعاون سے اس آفت پر قابو پالیں گے۔
