گال ٹیسٹ سیریز: پاکستانی کی سری لنکا کو تاریخ ساز شکست

پاکستان نے عبداللہ شفیق اور کپتان بابر اعظم کی عمدہ بیٹنگ کی بدولت سری لنکا کو پہلے ٹیسٹ میچ میں 4 وکٹوں سے شکست دے کر گال اسٹیڈیم میں سب سے بڑے ہدف کے حصول کا نیا ریکارڈ بنا دیا۔

گال میں کھیلے گئے سیریز کے پہلے ٹیسٹ میچ کے پانچویں دن پاکستان نے 222 رنز تین کھلاڑی آؤٹ سے اپنی دوسری نامکمل اننگز دوبارہ شروع کی تو اسے فتح کے لیے مزید 120 رنز درکار تھے۔

سنچری بنانے والے عبداللہ شفیق کے ہمراہ نائب کپتان محمد رضوان موجود تھے اور دونوں نے مل کر چوتھی وکٹ کے لیے 71 رنز کی شراکت قائم کی، اس مرحلے پر جے سوریا نے 40 رنز بنانے والے رضوان کو چلتا کردیا۔

دوسرے اینڈ سے عبداللہ نے عمدہ بیٹنگ جاری رکھی اور نئے بلے باز آغا سلمان کے ساتھ مزید 22 رنز جوڑے البتہ پہلا ٹیسٹ میچ کھیلنے والے آغا سلمان دوسری اننگز میں بھی خاطر خواہ کھیل پیش نہ کر سکے اور 12 رنز بنانے کے بعد جے سوریا کی اننگز میں چوتھی وکٹ بن گئے۔

آغا سلمان کے آؤٹ ہوتے ہی امپائرز نے میچ کے آخری دن کھانے کے وقفے کا اعلان کردیا تھا۔

پانچ وکٹیں گرنے کے بعد اسکور کو تیزی سے آگے بڑھانے کے لیے حسن علی کو میدان میں بھیجا گیا لیکن وہ صرف ایک چوکا مارنے کے بعد اگلی ہی گیند پر آؤٹ ہوگئے۔

اس کے بعد عبداللہ شفیق کا ساتھ دینے محمد نواز آئے اور ابتدائی طورپر یہ جوڑی خاصی محتاط رہی لیکن پھر دونوں نے کھل کر بیٹنگ کرنا شروع کی۔

عبداللہ شفیق نے اس دوران بہترین بیٹنگ جاری رکھتے ہوئے اپنے 150 رنز مکمل کیے اور دونوں نے مل کر اسکور کو 325 تک پہنچا دیا، اس موقع پر سری لنکا کو ایک وکٹ لینے کا موقع ملا لیکن ڈیپ اسکوائر لیگ پر کاسن رجیتھا آسان کیچ ڈراپ کر بیٹھے۔

اس کے بعد دونوں نے مزید رنز جوڑتے ہوئے اسکور کو 331 تک پہنچا دیا لیکن اس مرحلے پر میچ میں بارش نے مداخلت کردی جس کی وجہ سے کھیل کو روکنا پڑ گیا۔

بارش کے بعد میچ دوبارہ شروع ہوا تو پاکستان کو ہدف حاصل کرنے میں زیادہ دیر نہ لگی اور قومی ٹیم نے مزید کوئی وکٹ گنوائے بغیر ہی ہدف حاصل کر لیا۔

عبداللہ شفیق 160 رنز کی شاندار اننگز کھیل کر ناقابل شکست رہے، ان کی اننگز میں 7 چوکے اور ایک چھکا شامل تھا جبکہ نواز نے 19 رنز بنائے۔

پاکستان نے گال اسٹیڈیم میں 342 رنز کے ہدف کا کامیابی سے تعاقب کر کے اس میدان پر سب سے بڑے ہدف کے حصول کا نیا عالمی ریکارڈ بنا دیا۔

آج سے قبل اس اسٹیڈیم پر کبھی بھی 300 رنز سے زائد کا ہدف عبور نہیں کیا جاسکا اور اس سے قبل سب سے بڑے ہدف کے حصول کا ریکارڈ میزبان سری لنکا ہی کے پاس تھا جب اس نے 2019 میں نیوزی لینڈ کے خلاف 268 رنز کا ہدف حاصل کیا تھا۔

عبداللہ شفیق کو شاندار بیٹنگ پر میچ کا بہترین کھلاڑی قرار دیا گیا۔

واضح رہے کہ سری لنکا نے میچ میں پہلے بیٹنگ کرتے ہوئے پہلی اننگز میں 222 رنز بنائے تھے جس کے جواب میں پاکستان کی ٹیم 218 رنز بنا کر آؤٹ ہوگئی تھی۔

میچ کی دوسری اننگز میں سری لنکا نے 337 رنز بنا کر پاکستان کو فتح کے لیے 342 رنز کا ہدف دیا تھا۔

وزیراعظم پاکستان شہباز شریف کی ٹیم کو مبارکباد 

وزیراعظم محمد شہباز شریف نے سری لنکا کے خلاف پہلے ٹیسٹ میں شاندار کامیابی پر پاکستان کرکٹ ٹیم اور عوام کو مبارکباد دی ہے۔

اپنے ٹویٹ میں انہوں نے کہا کہ پاکستان کی سری لنکا کے خلاف پہلے ٹیسٹ میچ میں شاندار جیت پر قوم اور پاکستانی کرکٹ ٹیم کو مبارکباد پیش کرتا ہوں۔

پاکستانی ٹیم کے کپتان بابر اعظم کی اچھی حکمت عملی اور بہترین بلے بازی پر عبداللہ شفیق کو خاص طور پر سراہتا ہوں۔ پوری ٹیم نے بہترین کھیل کے ذریعے قوم اور کرکٹ شائقین کو خوش کیا۔

Read Previous

ترکیہ نے کبھی بھی عراقی شہریوں کے خلاف کوئی غلط اقدامات نہیں کیے، وزیر خارجہ

Read Next

پاکستانی قومی اسمبلی کے اسپیکر راجہ پرویز اشرف استنبول پہنچ گئے، علی شاہین سے ملاقات

Leave a Reply