تُرک ڈرامہ سیریل ارطغرل غازی کے پروڈیوسر اور اسکرین رائٹر مہمت بوزداع نے پاکستان اور ترکی کے درمیان فن و ثقافت کے شعبے میں ایک دوسرے کے ساتھ کام کرنے کی ضرورت پر زور دیا ہے۔ پاکستان میں ارطغرل کی کامیابی کے نئے ریکارڈز بن رہے ہیں جو ڈرامہ سیریل ارطغرل کی ٹیم کیلئے ایک بڑی خوشی کی بات ہے۔ مہمت بوزداع نے کہا کہ ہم کیسے بھائی ہیں کہ کئی سال سے ایک دوسرے کو جانتے ہوئے بھی ابھی تک مشترکہ فلمسازی یا فن و ثقافت کے شعبے میں کوئی معاہدہ نہیں کیا۔ انہوں نے کہا کہ پاکستان اور ترکی کے لوگوں کو نہ صرف سیاست اور تجارت میں ایک دوسرے کے ساتھ تعاون کرنا چاہیئے بلکہ فن و ثقافت اور مشترکہ فلمسازی میں بھی معاہدوں کی ضرورت ہے۔
تُرک مقامی میڈیا سے بات کرتے ہوئے انہوں نے کہا کہ مجھے حیرت ہے کہ ہم نے آج فن و ثقافت میں کوئی تعاون نہیں کیا۔ ہم برادر اسلامی ممالک ہیں لیکن فن و ثقافت میں ایک دوسرے سے دور ہیں تو پھر دوستی کہاں ہے؟ انہوں نے مشترکہ منصوبے شروع کرنے کی ضرورت پر زور دیا جہاں پروڈیوسر اور اداکار اکٹھے ہوں۔ ارطغرل وزیر اعظم عمران خان کی ہدایت پر پاکستان ٹیلی ویژن پر اردو ڈبنگ کے ساتھ نشر کیا جارہا ہے۔ یہ ڈرامہ پاکستان میں بے پناہ پسند کیا گیا اور اس نے یوٹیوب پر دیکھنے والوں کے نئے ریکارڈ قائم کردیئے ہیں۔
