Sehar Naseer 
مقبوضہ دریائے اردن کے مغربی کنارے میں یہودی آبادکاروں کے فلسطینیوں پر اجتماعی حملوں کے نتیجے میں ایک فلسطینی شہید اور 12 زخمی ہو گئے ہیں۔
دریائے اردن کے مغربی کنارے میں کشیدگی کے دوران یہودی آبادکاروں نےفلسطینیوں پر حملے کرنا شروع کر دیئے ہیں۔
اسرائیلی فوج کے زیرِ قبضہ یہودی آبادکاروں نے رام اللہ میں فلسطینیوں کی کئی گاڑیوں اور گھروں کو نذرِ آتش کر دیا جس پر ردعمل کا مظاہرہ کرنے والے فلسطینی مکینوں اور یہودی آبادکاروں کے درمیان جھڑپ ہو گئی۔
فلسطین وزارت صحت کے بیان کے مطابق مسلح یہودی آبادکاروں کے ترمسعیا کے فلسطینی مکینوں پر حملے کے نتیجے میں27 سالہ فلسطینی نوجوان عمر ابوالقطین شہید جبکہ 12 زخمی ہو گئے ہیں۔
اقوام متحدہ کے سیکرٹری جنرل انتونیو گوتریش کی مذمت:
اقوام متحدہ کے سیکرٹری جنرل انتونیو گوتریش نے بھی مقبوضہ فلسطین میں جاری تشدد اور جانی نقصان پر گہرے افسوس کا اظہار کیا ہے۔
اقوام متحدہ کے نائب ترجمان فرحان حق نے اپنے بیان میں کہا ہے کہ عالمی ادارہ کے سربراہ انتونیوگوتریش نے فلسطینی شہریوں کے خلاف ان دہشت گردانہ کارروائیوں کی شدید مذمت کی ہے۔
