اسرائیلی وزیر دفاع بینی گینٹز نے دھمکی دی ہے کہ عالمی برادری کا انتظار کئے بغیر ایران کے نیوکلیئر ہتھیاروں کے بڑھتے ہوئے خطرے سے خود نمٹ لیں گے۔
امریکی میڈیا سے بات کرتے ہوئے انہوں نے کہا کہ اگر ضرورت محسوس ہوئی تو اسرائیل ایران سے اکیلا ہی نمٹ لے گا۔
انہوں نے کہا کہ ایران نے دنیا سے کئے ہوئے اپنے تمام وعدے توڑ دیئے ہیں۔ عالمی برادری کے ساتھ کئے ہوئے تمام معاہدوں پر ایران نے کبھی بھی عمل نہیں۔
اسرائیلی وزیر دفاع نے کہا کہ امریکہ اور عالمی برادری نے ایران کے ساتھ 2015 میں جو نیوکلیئر معاہدہ کیا تھا اس میں اسرائیل اور مشرق وسطیٰ کے دیگر ممالک کو شامل نہیں کیا تھا۔ اب ایران نے اپنے جوہری ہتھیاروں کی تیاری کو ملک بھر میں پھیلا دیا ہے۔
انہوں نے امریکہ پر زور دیا کہ ایران کو جوہری ہتھیاروں کی تیاری سے باز رکھنا ہو گا۔ اگر امریکہ اور عالمی برادری ایران کو نیوکلیئر ہتھیاروں کی تیاری سے نہ روک پائی تو اسرائیل کے پاس اس کے سوا کوئی دوسرا چارہ نہیں ہو گا کہ اپنی اور خطے میں اپنے اتحادیوں کی حفاظت کے لئے از خود سے کارروائی کریں۔
اسرائیلی وزیر دفاع کا کہنا تھا کہ ہمیں اپنی حفاظت خود کرنی آتی ہے اور اس کے لئے واشنگٹن کو شامل کئے بغیر خود سے کوئی بھی اقدام کر سکتے ہیں۔ اسرائیل حملہ کرنے اور اپنے دفاع کی صلاحیتوں کو بہتر بنانے کے لئے تیزی سے کام کر رہا ہے۔
ایک سوال کے جواب میں بینی گینٹز نے کہا کہ ایران کے حمایت یافتہ حزب اللہ کے پاس سینکڑوں میزائل ہیں۔ انٹرویو کے دوران ایک نقشہ دکھاتے ہوئے اسرائیلی وزیر دفاع نے کہا کہ حزب اللہ لبنان سے اسرائیل کے شہری علاقوں کو نشانہ بنانے کی تیاری کر رہی ہے۔ اسرائیل اپنے دفاع کے لئے کسی بھی اقدام سے گریز نہیں کرے گا۔
