ترکیہ ،استنبول میں جمعہ 04 اگست 2023 کو تحریک کشمیر یو کے کی جانب سے ترکیہ میں مقیم کشمیریوں اور ترک سول سوسائٹی کے اشتراک سے کشمیریوں کے خلاف بھارتی مظالم کی مذمت اور مقبوضہ کشمیر میں مقیم مظلوم کشمیریوں کی حمایت کا اعادہ کرنے کے لیے ایک بین الاقوامی کانفرنس کا انعقاد کیا گیا۔
تقریب کے خصوصی مہمانان میں ترکیہ میں پاکستان کے سفیر ڈاکٹر یونس جنید حکمران جماعت آق پارٹی سے تعلق رکھنے والی ترک رکن پارلیمنٹ طوبی اِشیک ایرجان ، ینی رفاح پارٹی کے رکن پارلیمنٹ اور پارٹی کے ڈپٹی چیئرمین دوان بیکن، سعادت پارٹی کے رکن پارلیمنٹ اور ڈپٹی چیئرمین مصطفی کایا اور کویت سے رکن پارلیمنٹ محمد المطیری شامل تھے۔ دیگر بین الاقوامی مقررین میں کویت سے انسانی حقوق کے وکلاء میجبل ایم ایم الراشدی اور دالیہ الاجمی بھی شامل تھے۔ اس موقع پر کئی سینئر کشمیری رہنماوں اور آزاد جموں کشمیر کی دستور ساز اسمبلی کے اراکین نے شرکت کی۔
قریب سے اسپیکر آزاد جموں و کشمیر اسمبلی چوہدری لطیف اکبر، سابق رکن آزاد جموں و کشمیر اسمبلی عبدالرشید ترابی اور آل پارٹیز حریت کانفرنس کے قائدین الطاف احمد بھٹ اور محمود احمد ساغر کے علاوہ سینئر کشمیری لیڈر ڈاکٹر مبین اور تحریک کشمیر یوکے کے سربراہ فہیم کیانی نے بھی خطاب کیا۔
تقریب کی آرگنائزنگ کمیٹی کے سربراہ احسن شفیق نے مقررین اور سامعین کا شکریہ ادا کیا جو دنیا کے مختلف حصوں سے کشمیری بھائیوں کی حمایت کے لیے خصوصی طور پہ استنبول تشریف لائے تھے۔
مقررین نے دنیا سے بھارتی بربریت کے خلاف ٹھوس اقدامات مطالبہ دہرایا ۔ آخر میں تحریک کشمیر یوکے کے صدر فہیم کیانی نے قرارداد پڑھ کر سنائی جو متفقہ طور پر منظور کی گئی۔ ایوان نے بھارتی مظالم اور اس کے آرٹیکل 370 اور 35A کو منسوخ کرنے کی مذمت کی اور عالمی برادری اور اقوام متحدہ جیسے اداروں سے بھارت کے خلاف بھرپور کارروائی کا مطالبہ کیا۔ تقریب کے اختتام پہ مہمانوں کو یادگاری شیلڈز پیش کی گئیں ۔
