پاکستان کے وزیر خارجہ شاہ محمود قریشی نے ترک وزیر خارجہ میلوت چاوش اولو سے ٹیلی فونک رابطہ کیا۔ گفتگو میں خطے کے مسائل دو طرفہ تعاون میں فروغ اور مشترکہ مفادات کے حوالے سے مشاورت کی۔
وزیرخارجہ شاہ محمودقریشی نے پاکستان کے اس پختہ عزم کااعادہ کیاہے کہ وہ افغان امن عمل سمیت علاقائی امن وسلامتی کے لئے اپنامثبت کرداراداکرتارہے گا۔
وزیرخارجہ نے کشمیرکے تنازعہ پرترکی کے مستقل اوردوٹوک موقف پرترک ہم منصب کا شکریہ اداکیا۔انہوں نے کہاکہ ترک صدر رجب طیب اردوان نے اقوام متحدہ کی جنرل اسمبلی کے پچھترویں اجلاس میں مظلوم کشمیری عوام کی آوازبلند کی جس سے کشمیری عوام کوحوصلہ اوراعتمادملاہے۔
انہوں نے کہاکہ یہ بات باعث اطمینان ہے کہ دونوں ملک علاقائی اورعالمی امورپر یکساں خیالات رکھتے ہیں۔
ترک وزیرخارجہ نے پاکستان کی طرف سے افغانستان میں امن کے لئے کوششوں سمیت علاقائی امن کے لئے اقدامات کوسراہا۔
