بائیڈن انتظامیہ نے گذشتہ سال فروری میں امریکہ اور طالبان کے درمیان طے پانے والے امن معاہدے پر نظرثانی کرنے اور اس کا دوبارہ جائزہ لینے کا فیصلہ کیا ہے۔
واضح رہے کہ گذشتہ سال فروری میں سابق امریکی صدر ڈونلڈ ٹرمپ انتظامیہ اور طالبان کے درمیان امن معاہدہ طے پایا تھا جس کے بعد صدر ٹرمپ نے افغانستان سے امریکی فوج کے انخلا کا اعلان کیا تھا۔ اب تک 2500 امریکی فوجی افغانستان چھوڑ کر امریکہ واپس جا چکے ہیں۔ اس وقت افغانستان میں 2500 امریکی اور اس کے اتحادی فوجی موجود ہیں۔
بائیڈن انتظامیہ کے قومی سلامتی کے مشیر جیک سولیوان نے اپنے افغان ہم منصب حمداللہ محب کے ساتھ ٹیلی فون پر رابطہ کیا۔ دونوں رہنماوٗں نے امریکہ افغان تعلقات اور خطے میں امن و استحکام سے متعلق بات چیت کی۔
امریکی قومی سلامتی کے مشیر نے کہا کہ افغانستان اور طالبان کے درمیان ایک پائیدار امن معاہدے کو یقینی بنانے کے لئے امریکہ ہر ممکن تعاون کرے گا۔ انہوں نے کہا کہ بائیڈن انتظامیہ گذشتہ سال فروری میں امریکہ طالبان معاہدے پر نظرثانی کرے گا۔ دیکھا جائے گا کہ امن معاہدے کے بعد افغانستان میں دہشت گرد حملوں اور افغان طالبان کے جنگجووں کے ساتھ تعلقات کس نوعیت کے ہیں۔
انہوں نے کہا کہ امریکہ افغان خواتین کی جاری جدوجہد کو جاری رکھے گا اور خواتین کو ہر شعبے میں آگے آنے میں مدد فراہم کرے گا۔
بائیڈن انتظامیہ امن معاہدے پر نیٹو اتحادیوں سے بھی مشاورت کرے گی۔ افغان حکومت کو بھی اعتماد میں لیا جائے گا۔
