عرب لیگ کا اسرائیل اور یو اے ای معاہدے کی مذمت سے انکار

عرب ممالک کی تنظیم عرب لیگ نے اسرائیل اور یو اے ای کے درمیان ہونے والے معاہدے کی مذمت کرنے سے انکار کر دیا۔

سفارتی ذرائع کے مطابق فلسطین نے عرب لیگ کے اجلاس میں اسرائیل اور یو اے ای کے درمیان ہونے والے معاہدے کی مذمتی قرار داد پیش کی لیکن عرب ممالک نے اس قرار داد کو منظور کرنے سے انکار کر دیا۔

اجلاس میں بعض عرب ممالک نے اسرائیل اور یو اے ای کے معاہدے کو قانونی قرار دینے کے لئے ایک مسودہ پیش کیا۔ تاہم ذرائع نے ان ممالک کا نام بتانے سے گریز کیا۔

اجلاس میں فلسطین کے وزیر خارجہ ریاض المالکی نے عرب ممالک سے یو اے ای اور اسرائیل کے معاہدے کو مسترد کرنے کا مطالبہ کیا۔

واضح رہے کہ یو اے ای نے 13 اگست کو اسرائیل کو بحیثیت ریاست تسلیم کرتے ہوئے اس کے ساتھ سفارتی تعلقات قائم کرنے کا ایک معاہدہ کیا ہے۔ یہ معاہدہ امریکہ کے اثر و رسوخ سے طے پایا تھا۔