جہلم میں 46ویں پاکستان آرمی رائفل ایسوسی ایشن (PARA) کے مرکزی نشانہ بازی مقابلوں کی اختتامی تقریب منعقد ہوئی، جس میں فیلڈ مارشل پاکستان عاصم منیر نے بطور مہمانِ خصوصی شرکت کی۔ تقریب میں چیف آف نیول اسٹاف ایڈمرل نوید اشرف سمیت اعلیٰ فوجی حکام اور مقابلوں میں نمایاں کارکردگی دکھانے والے نشانہ باز بھی موجود تھے۔
آرمی مارکس مین شپ یونٹ (AMU) جہلم میں منعقد ہونے والے یہ مقابلے 7 اکتوبر سے 11 نومبر 2026 تک جاری رہے۔ ایونٹ میں پاک فوج، پاک بحریہ، پاک فضائیہ، سول آرمڈ فورسز اور شہریوں سے تعلق رکھنے والے 1500 سے زائد نشانہ بازوں نے حصہ لیا۔ مقابلوں کا مقصد نشانہ بازی کی مہارت، پیشہ ورانہ صلاحیتوں اور مختلف شعبوں سے تعلق رکھنے والے شوٹرز کی کارکردگی کو جانچنا تھا۔
مقابلوں کے دوران مختلف کیٹیگریز میں نشانہ بازوں نے اپنی صلاحیتوں کا مظاہرہ کیا۔ چوتھی انٹر سروسز کامبیٹ شوٹنگ چیمپئن شپ کی ٹرافی پاک فوج نے اپنے نام کی، جبکہ پنجاب رجمنٹ سے تعلق رکھنے والے حوالدار فضل الرحمان کو غیر معمولی مہارت اور نمایاں کارکردگی کے اعتراف میں اعلیٰ ترین فوجی اعزاز ’ماسٹر ایٹ آرمز ٹرافی‘ سے نوازا گیا۔
اختتامی تقریب سے خطاب کرتے ہوئے فیلڈ مارشل سید عاصم منیر نے مقابلوں میں شریک نشانہ بازوں کی مہارت، پیشہ ورانہ لگن اور درست نشانہ بازی کو سراہا۔ ان کا کہنا تھا کہ چھوٹے ہتھیاروں کے استعمال اور ان پر مکمل مہارت حاصل کرنا ایک پیشہ ور فوجی کی بنیادی صلاحیتوں میں شامل ہونا چاہیے۔
انہوں نے اس بات پر زور دیا کہ نشانہ بازی میں مہارت فوجی تربیت کا ایک اہم جزو ہے، جو عملی میدان میں پیشہ ورانہ استعداد اور تیاری کو بہتر بنانے میں معاون ثابت ہوتی ہے۔
46ویں پاکستان آرمی رائفل ایسوسی ایشن کے مرکزی مقابلوں کا اختتام مختلف شعبوں سے تعلق رکھنے والے نشانہ بازوں کی صلاحیتوں کے اعتراف اور نمایاں کارکردگی دکھانے والوں میں انعامات کی تقسیم کے ساتھ ہوا۔
