ترکی کے صدر رجب طیب ایردوان نے کہا ہے کہ امریکہ کی طرف سے لگائی گئی پابندیاں کھلم کھلا ہماری ملکی خود مختاری پر حملہ ہے۔
صدر رجب طیب ایردوان نے انقرہ موٹر وے کی افتتاحی تقریب سے خطاب کے دوران کہا کہ ترکی نیٹو کے رکن ممالک میں سے پہلا ملک ہے جس پر پابندیاں لگائی جا رہی ہوں۔
روس سے ایس۔400 سسٹم خریدنے کی وجہ سے امریکہ کے ترکی پر پابندیاں لگانے کا تذکرہ کرتے ہوئے انہوں نے کہا ہے کہ "امریکہ کا اصل مقصد دفاعی صنعت میں ترکی کی ترقی کا راستہ کاٹنا اور ہمیں محتاج بنانا ہے”۔
انہوں نے مزید کہا ہے کہ پابندیوں کے ذریعےانسدادِ مخاصمت کے قانون CAATSA کے معاملے میں امریکہ نے ترکی کے علاوہ کسی اور ملک پر یہ پابندیاں نہیں لگائیں۔
صدر ایردوان نے کہا ہے کہ اس فضائی دفاعی سسٹم کے حصول کے لئے امریکہ نے ہماری کسی بھی شرط کو پورا نہیں کیا اور جب ہم نے اپنی ضرورت کو کسی اور جگہ سے پورا کر لیا ہے تو اس نے پابندیوں کو اسلحے کے طور پر استعمال کرنا شروع کر دیا ہے۔پابندیوں کا فیصلہ ہماری ملکی خودمختاری پر کھُلا حملہ ہے۔ہم، دفاعی صنعت کے سربراہ اسماعیل دیمیر اور ان کی ٹیم کے ساتھ پہلے سے بھی زیادہ تعاون کریں گے۔
صدر ایردوان نے کہا ہے کہ ” پابندیوں کا فیصلہ ہمیں روک نہیں سکتا بلکہ اس فیصلےکی وجہ سے ہم عالمی سطح پر قائدانہ حیثیت کی حامل دفاعی صنعت کی تعمیر کے لئے اپنی کاروائیوں کو تیز تر کر دیں گے۔ ہم اپنی دفاعی صنعت کو خود کفیل بنانے کے لئے ماضی کے مقابلے میں دوگنی محنت کریں گے”۔
