امریکا میں آج وسط مدتی انتخابات کی ووٹنگ کا دن ہے، جن میں ایوانِ نمائندگان اور سینیٹ کا کنٹرول حاصل کرنے کے لیے ڈیموکریٹس اور ریپبلکنز آمنے سامنے ہیں۔
ملک بھر میں ایوانِ نمائندگان کی تمام 435 نشستوں اور سینیٹ کی 100 میں سے 35 نشستوں پر ووٹ ڈالے جا رہے ہیں، جبکہ 36 ریاستوں میں گورنرز کا انتخاب بھی ہو رہا ہے۔ ایوانِ نمائندگان میں اکثریت کے لیے 218 نشستیں درکار ہیں۔ ریپبلکنز اس وقت دونوں ایوانوں میں اکثریت رکھتے ہیں، جبکہ ڈیموکریٹس ان سے ایوانِ نمائندگان کا کنٹرول واپس لینے کی کوشش کر رہے ہیں۔
مزید اپڈیٹس کیلئے وٹس ایپ چینل فالو کریں: چینل لنک
مختلف انتخابی جائزوں میں ایوانِ نمائندگان کے لیے ڈیموکریٹس کو برتری حاصل ہے۔ نیٹ سلور کے انتخابی ماڈل کے مطابق ڈیموکریٹس کی ایوان میں اکثریت حاصل کرنے کی پوزیشن خاصی مضبوط ہے۔ تاہم سینیٹ میں مقابلہ زیادہ پیچیدہ ہے اور دونوں جماعتوں کے درمیان کئی ریاستوں میں سخت مقابلہ متوقع ہے۔
سینیٹ کی اہم نشستوں کے لیے ٹیکساس، اوہائیو، مشی گن، مین، آئیووا، کنساس اور الاسکا سمیت کئی ریاستیں توجہ کا مرکز ہیں۔ ریپبلکنز کو سینیٹ میں 53 جبکہ ڈیموکریٹس کو 47 نشستیں حاصل ہیں۔ ڈیموکریٹس کو سینیٹ میں اکثریت حاصل کرنے کے لیے کم از کم 4 نشستوں کا اضافہ کرنا ہوگا۔
انتخابی مہم کے دوران مہنگائی، روزگار، تجارتی محصولات، ایران کے ساتھ جنگ اور صدر ٹرمپ کی پالیسیوں پر عمل درآمد اہم موضوعات رہے۔ یہ انتخابات ٹرمپ انتظامیہ کی ابتدائی 2 برس کی کارکردگی پر عوامی ردعمل کا پیمانہ بھی سمجھے جا رہے ہیں۔
مزید اپڈیٹس کیلئے وٹس ایپ چینل فالو کریں: چینل لنک
اگر ڈیموکریٹس ایوانِ نمائندگان میں اکثریت حاصل کر لیتے ہیں تو انہیں حکومتی پالیسیوں کی نگرانی، انتظامیہ کے خلاف تحقیقات اور قانون سازی پر اثر انداز ہونے کے زیادہ مواقع ملیں گے۔ سینیٹ میں اکثریت تبدیل ہونے سے حکومتی تقرریوں اور صدارتی نامزدگیوں کی منظوری کا عمل بھی متاثر ہو سکتا ہے۔
انتخابی نتائج امریکی کانگریس میں طاقت کا توازن تبدیل کرنے کے ساتھ صدر ٹرمپ کے باقی 2 برس کے دورِ صدارت کے لیے بھی اہم ثابت ہوں گے۔ بعض سخت مقابلوں میں ووٹوں کی گنتی اور نتائج کے حتمی اعلان میں کئی روز لگ سکتے ہیں۔
