ترک صدر رجب طیب ایردوان نے دورہ آذر بائیجان کے موقع پر آرمینیائی قبضے سے آزاد کرائے گئے علاقے زنگیلان میں نئے ایئر پورٹ کا افتتاح کردیا۔
ترک صدر ایردوان نے اپنے آذربائیجانی ہم منصب الہام علی یوف کے ساتھ زنگیلان ائیر پورٹ کا افتتاح کیا۔
صدر ایردوان زنگیلان بین الاقوامی ہوائی اڈے پر اترنے والے پہلے غیر ملکی سربراہ ہیں۔
یہ آذربائیجان کا وہ علاقہ ہے جو 2020 کاراباخ تنازعہ کے دوران آرمینیا سے دوبارہ حاصل کیے گئے علاقوں میں شامل ہے اور یہ دوسرا ہوائی اڈہ ہے۔
اس سے قبل ترکیہ کے صدر رجب طیب ایردوان آذربائیجان کے صدر الہام علی یوف کی دعوت پر آذربائیجان کےایک روزہ دورے پر زنگیلان پہنچے تھے۔
جمہوریہ آذربائیجان کے صدر الہام علی یوف نے ہوائی اڈے پر ترک صدر رجب طیب ایردوان کا استقبال کیا تھا۔
دونوں ممالک کے قومی پرچموں سے سجے زنگیلان انٹرنیشنل ایئرپورٹ پر ترک صدر کے لیے گارڈ آف آنر کا اہتمام کیا گیاتھا۔
صدر ایردوان زنگیلان بین الاقوامی ہوائی اڈے کی افتتاحی تقریب میں شرکت کے لئے آئے ہیں، جو آذربائیجان کی آزاد کردہ سرزمین پر ترک کمپنیوں کے تعاون سے تعمیر کیا گیا دوسرا ہوائی اڈہ ہے۔
وہ اپنے ایک روزہ دورے میں خطے کی ترقی کے لیے شروع کیے گئے نئے منصوبوں کا سنگ بنیاد بھی رکھیں گے۔
دوطرفہ ملاقاتوں کے دوران،ترکیہ اور آذربائیجان کے درمیان تعلقات کا تمام شعبوں میں جائزہ لیا جائے گا، اور تعاون کو مزید فروغ دینے کے لیے اٹھائے جانے والے اقدامات پر تبادلہ خیال کیا جائے گا۔
