ترکیہ کے وزیر خارجہ، حاقان فیدان اور روس کے وزیر خارجہ، سرگئی لاوروف کے درمیان ایک اہم ٹیلی فونک رابطہ ہوا، جس میں شام کی موجودہ صورتحال، علاقائی پیش رفت اور باہمی تعاون پر تفصیلی تبادلہ خیال کیا گیا۔
ترکیہ کی وزارت خارجہ کے ذرائع کے مطابق، اس بات چیت میں دونوں رہنماؤں نے شام میں سیاسی استحکام اور قومی یکجہتی کی ضرورت پر زور دیا اور وہاں جامع سیاسی منتقلی کے عمل کو آگے بڑھانے کی اہمیت کو اجاگر کیا۔
دونوں ممالک نے شام کی علاقائی سالمیت اور داخلی استحکام کیلئے اپنی حمایت جاری رکھنے کے عزم کا اعادہ کیا۔
ملاقات میں ترکیہ اور روس کے درمیان سفارتی تعاون کو مزید مضبوط بنانے اور شام میں قیام امن کیلئے جاری کوششوں کو تیز کرنے کے امکانات پر بھی تبادلہ خیال کیا گیا۔
دونوں وزرائے خارجہ نے اس بات پر اتفاق کیا کہ، شام میں پائیدار استحکام کیلئے بین الاقوامی برادری کو مزید مؤثر کردار ادا کرنا ہوگا۔
