سعودی عرب کا پرچم ڈیزائن کرنے والے معروف خطاط صالح المنصوف انتقال کرگئے ۔
عرب میڈیا کے مطابق سعودی خطاط صالح المنصوف، جنہوں نے سعودی عرب کے پرچم پرسفید رنگ سے کلمہ طیبہ اور تلوار کے ڈیزائن کو اپ ڈیٹ کیا ، 86 برس کی عمر میں مملکت کے یوم پرچم سے عین قبل انتقال کر گئے۔
رپورٹس کے مطابق المنصوف پہلے سعودی خطاط تھے جنہوں نے ٹیکنالوجی اور پرنٹنگ کے آلات دستیاب نہ ہونے کے باوجود 1960 کی دہائی کے اوائل میں سفید رنگ سے سعودی عرب کے جھنڈے پر تلوار اور کلمہ ہاتھ سے لکھنے کا اعزاز حاصل کیا۔
اس کے علاوہ وہ ان پہلے خطاطوں میں سے ایک تھے جن کے ہاتھ کی لکھائی امام محمد بن سعود یونیورسٹی کے متعدد فارغ التحصیل طلبہ کے سرٹیفکیٹس پر مزین تھی۔
واضح رہے کہ رواں ماہ سعودی عرب کے فرمانروا شاہ سلمان نے ہر سال 11 مارچ کو یوم پرچم منانے کا فرمان جاری کیا تھا۔
شاہی فرمان میں شاہ سلمان نے کہا تھا کہ 24 ذوالحجۃ 1355 ہجری بمطابق 11 مارچ 1937 کو شاہ عبدالعزیز نے قومی پرچم کی توثیق کی جو آج ہم سب کے سامنے ہے۔
