وزیراعظم پاکستان شہباز شریف کا دورہ قازقستان

قازقستان میں ہونے والے ایشیا میں روابط اور اعتماد سازی کے اقدامات سے متعلق سربراہی اجلاس (سیکا) میں وزیراعظم پاکستان شہباز شریف نے مختلف ممالک کے سربراہان سے ملاقاتیں کی ہیں اور دوطرفہ تعلقات کے مختلف پہلووں پر تبادلہ خیال کیا۔

وزیراعظم پاکستان  سے بیلا روس کے صدر الیگزینڈرلوکاشینکو اور ویت نام کی نائب صدر وو تھی انا شوان نے بھی ملاقات کی۔

یہ ملاقاتیں قازقستان کے شہر آستانہ میں جاری سیکا اجلاس کے موقع پر ہوئیں، دریں اثنا، سیکا سربراہی اجلاس کے موقع پر اجلاس میں شرکت کرنے والے رکن ممالک کے رہنمائوں کا فوٹو سیشن بھی ہوا۔

وزیراعظم کی فلسطینی صدر محمود عباس سے ملاقات

وزیراعظم پاکستان شہباز شریف سے فلسطین کے صدر محمود عباس نے ملاقات کی، جہاں دونوں رہنماؤں کے درمیان دلچسپ جذباتی مکالمہ بھی ہوا اور دونوں نے اسلامی اخوت اور بھائی چارے کی مثالیں دیں۔

فلسطینی صدر محمود عباس نے وزیراعظم شہبازشریف سے گفتگو کی اور ایک دوسرے کا شکریہ ادا کیا۔

وزیراعظم نے فلسطین کے صدر سے گفتگو کرتے ہوئے کہا کہ سیلاب کے دوران آپ کی مدد پر بے حد شکرگزار ہیں۔

صدر محمود عباس نے کہا کہ پاکستان ہمارا گھر ہے، پاکستانی ہمارے بھائی اور بہنیں ہیں، پاکستانی ہمارے گھر کے لوگ ہیں، ہم نے ان کے لیے کچھ بھی نہیں کیا۔

وزیراعظم شہباز شریف نے کہا کہ ایسی بات نہیں ہے بلکہ فلسطین نے سیلاب زدگان کی جس طرح مدد کی، ہم بھول نہیں سکتے، پاکستان فلسطینیوں کو کبھی بھول نہیں سکتا، آپ کی کامیابی تک پاکستان آپ کے حق کے لیے آواز بلند کرتا رہے گا۔

فلسطینی صدر محمود عباس نے کہا کہ ہم بھی پاکستان کو کبھی نہیں بھول سکتے، 100 سال سے ہم پاکستانیوں کو کبھی نہیں بھولے، مفتی فلسطین اپنی وفات تک پاکستان میں رہے، ان کی دیکھ بھال پاکستان نے کی، قیام پاکستان سے پہلے سے ہم پاکستانیوں کے ساتھ ہیں۔

وزیراعظم شہباز شریف نے کہا کہ فلسطین ہمارے ایمان اور یقین کا حصہ ہے، فلسطین ہمارے دل میں ہے۔

انہوں نے کہا کہ آج کی کانفرنس میں پاکستان کی حمایت کرنے والے رہنماؤں میں آپ شامل ہیں، آپ کی حمایت اور جذبے پر دل کی گہرائیوں سے شکریہ ادا کرتا ہوں۔

آذربائیجان کے صدر سے ملاقات

وزیراعظم شہبازشریف نے سیکا سربراہی اجلاس کے موقع پر آذربائیجان کے صدر الہام علییوف کے ساتھ کی اور اس حوالے سے ان کا کہنا تھا کہ یہ ملاقات زبردست رہی۔

سماجی رابطوں کی ویب سائٹ ٹوئٹر پر وزیر اعظم شہباز شریف نے کہا کہ ہم نے گزشتہ ماہ شنگھائی تعاون تنظیم (ایس سی او ) اجلاس کے دوران ہونے والی بات چیت پر مزید پیش رفت کی ہے۔

انہوں نے کہا کہ آئندہ فصلوں کی بوائی کے لیے یوریا کی ضروریات پوری کرنے کی پیش کش پر ہم ان کے شکر گزار ہیں۔

قازقستان کے صدر سے ملاقات