پاک فوج کے ترجمان لیفٹیننٹ جنرل احمد شریف چوہدری نے کہا ہے کہ سعودی عرب کی سلامتی، خودمختاری اور علاقائی سالمیت کے تحفظ کے لیے پاکستان کا عزم غیر متزلزل اور ناقابلِ سمجھوتہ ہے۔ انہوں نے کہا کہ پاکستان موجودہ حالات میں سعودی عرب کے دفاع کے لیے تمام ضروری اقدامات کرنے کو تیار ہے۔
پاک فوج کے ترجمان نے عرب اخبار ’الشرق الاوسط‘ کو انٹرویو دیتے ہوئے کہا کہ سعودی عرب اور حرمین شریفین کا تحفظ پاکستان کی اولین ترجیحات میں شامل ہے اور اس معاملے پر کوئی سمجھوتہ نہیں کیا جا سکتا۔
مزید اپڈیٹس کیلئے وٹس ایپ چینل فالو کریں: چینل لنک
لیفٹیننٹ جنرل احمد شریف چوہدری کے مطابق اسلام آباد ضرورت کے مطابق سعودی عرب کو دفاعی مقاصد کے لیے ہر ممکن تعاون فراہم کرتا رہے گا۔ اس میں فوجی اہلکاروں کی فراہمی، دفاعی صلاحیتوں میں معاونت، تربیت اور رسد سے متعلق مدد شامل ہے۔
انہوں نے سعودی عرب میں پاکستانی فوج کی موجودگی سے متعلق بتایا کہ پاکستانی فوجی پہلے ہی مختلف ذمہ داریوں کے تحت مملکت میں موجود ہیں۔ ان کی بنیادی ذمہ داریوں میں دفاعی معاونت، مشترکہ مشقیں اور فوجی تربیت شامل ہیں۔
یہ بیان ایک ایسے وقت میں سامنے آیا ہے جب یمن کے ایران نواز حوثی باغیوں کی جانب سے سعودی عرب پر حملوں کا سلسلہ جاری ہے۔ رپورٹ کے مطابق ان حملوں میں ڈرونز اور میزائلوں کے ذریعے مملکت کے توانائی کے مراکز، ہوابازی کے نظام اور شہری تنصیبات کو نشانہ بنایا گیا ہے۔ جمعرات کو سعودی سول ڈیفنس نے مکہ مکرمہ کے اوپر دو بیلسٹک میزائل تباہ کیے جانے کی بھی اطلاع دی۔
پاکستان اور سعودی عرب نے گزشتہ سال ستمبر میں دوطرفہ دفاعی معاہدے پر دستخط کیے تھے، جبکہ رواں سال 7 اگست کو پاکستان، سعودی عرب اور ترکیہ کے درمیان مکہ مشترکہ دفاعی معاہدہ طے پایا تھا۔ ان معاہدوں کے تحت کسی ایک رکن ملک پر حملے کو تمام رکن ممالک پر حملہ تصور کیا جائے گا۔
پاک فوج کے ترجمان نے کہا کہ سعودی عرب کو نشانہ بنانے والے حالیہ حملوں کے بعد مکہ اتحاد کی ذمہ داریوں پر عملی پیش رفت کا عمل شروع ہوا۔ ان حملوں نے پاکستان میں گہری تشویش پیدا کی ہے۔ انہوں نے سعودی عرب کے ہوائی اڈوں، شہروں اور شہری و معاشی تنصیبات پر حملوں کی شدید مذمت کرتے ہوئے انہیں سعودی خودمختاری اور علاقائی استحکام کے لیے براہِ راست خطرہ قرار دیا۔
ایران کے ساتھ مذاکرات کے حوالے سے لیفٹیننٹ جنرل احمد شریف چوہدری نے بتایا کہ مکہ مشترکہ دفاعی اتحاد کے نمائندوں اور ایران کے درمیان 26 اکتوبر کو تہران میں ہونے والی ملاقات کا مقصد کشیدگی میں کمی کے لیے ایک لائحہ عمل تیار کرنا اور علاقائی تعاون کو فروغ دینا تھا۔
مزید اپڈیٹس کیلئے وٹس ایپ چینل فالو کریں: چینل لنک
انہوں نے کہا کہ پاکستان کے چیف آف ڈیفنس فورسز فیلڈ مارشل جنرل سید عاصم منیر کی اس ملاقات میں شرکت اور اس سے چند روز قبل ان کا دورۂ تہران اس بات کا مظہر تھا کہ پاکستان علاقائی تنازعات کے حل کے لیے مذاکرات اور پُرامن کوششوں کو اہمیت دیتا ہے۔
ترجمان پاک فوج کے مطابق اجلاس میں شریک ممالک نے اس بات پر اتفاق کیا کہ خطے میں تعاون بڑھانے اور امن و استحکام کے فروغ کے لیے چاروں ممالک کے درمیان مذاکرات کا سلسلہ جاری رکھا جائے گا۔
