ozIstanbul

پاکستان: امیر جماعت اسلامی سراج الحق سے ترک سفیر کی الوداعی ملاقات

امیر جماعت اسلامی سراج الحق سے پاکستان میں تعینات ترکیہ کے سفیر احسان مصطفی یرداکل نے اسلام آباد میں الوداعی ملاقات کی۔ امیر جماعت اسلامی کی رہائش گاہ پر ہونے والی ملاقات میں دونوں ممالک کے درمیان تعلقات اور باہمی دلچسپی کے امور پر تبادلہ خیال ہوا۔ نائب امیر جماعت اسلامی میاں محمد اسلم بھی اس موقع پر موجود تھے۔
سراج الحق نے کہا کہ پاک ترکیہ تعلقات محض حکومتوں کے مابین ہی نہیں عوامی سطح پر قائم ہیں جو باہمی محبت اور احترام کے رشتوں پر استوار ہیں۔ پاکستان اور ترکیہ اسلامی دنیا کے دو اہم ترین ممالک ہیں،ضرورت اس امر کی ہے کہ دونوں باہمی بلاک تشکیل دے کر اسلامی دنیا کے مسائل اور خصوصی طور پر مسئلہ فلسطین و کشمیر کے حل اور اسلامو فوبیا کے تدارک کے لیے لائحہ عمل تشکیل دیں۔
امیرجماعت اسلامی نے مزید کہا کہ امت مسلمہ اس وقت بے شمار چیلنجز سے نبردآزما ہے، پاکستان اور ترکیہ کی ذمہ داری ہے کہ ان مسائل کے حل کے لیے کلیدی کردار اداکریں۔ انہوں نے پاکستان اور ترکیہ کا تجارت اور تعلیم کے شعبوں میں تعاون کو مزید بڑھانے کی ضرورت پر زور دیا۔
امیر جماعت نے کہا کہ دونوں ممالک کی حکومتوں کو پاکستان اور ترکیہ کے نوجوانوں کو قریب لانے کے اقدامات کرنے چاہییں اور اس ضمن میں وفود کے تبادلے بے حد ضروری ہیں۔امیر جماعت نے ترکش سفیر کو کامیابی سے بطور سفیر مدت پوری کرنے پر مبارکباد دی اور نئی ذمہ داریاں سنبھالنے کیلئے نیک خواہشات کا اظہارکیا۔ انہوں نے پاکستان اور ترکیہ کے درمیان دوطرفہ تعلقات کو فروغ دینے پر سفیر کی خدمات کو سراہا۔ترک سفیر احسان مصطفی یرداکل نے امیر جماعت اسلامی کا شکریہ ادا کیا اور کہا کہ انھیں یقین ہے کہ پاک ترک برادرانہ تعلقات ہمیشہ قائم و دائم رہیں گے۔

پچھلا پڑھیں

سعودی فرمانروا بن سلمان اردن سے آج ترکیہ پہچیں گے

اگلا پڑھیں

ترک صدر ایردوان کا برطانوی وزیراعظم سے ٹیلی فونک رابطہ، اہم امور پر تبادلہ خیال

تبصرہ شامل کریں