معرکۂ حق کی کامیابی کو ایک سال مکمل ہونے پر افواج پاکستان کی اعلیٰ عسکری قیادت نے پوری قوم، افسران اور جوانوں کو مبارکباد پیش کرتے ہوئے اس تاریخی کامیابی کو قومی اتحاد، عسکری مہارت اور دفاعی استحکام کی علامت قرار دیا ہے۔
پاک فوج کے شعبہ تعلقاتِ عامہ (آئی ایس پی آر) کی جانب سے جاری بیان کے مطابق فیلڈ مارشل سید عاصم منیر، چیف آف آرمی اسٹاف و چیف آف ڈیفنس اسٹاف، ایڈمرل نوید اشرف چیف آف دی نیول اسٹاف، اور ایئر چیف مارشل ظہیر احمد بابر سدھو چیف آف دی ایئر اسٹاف نے معرکۂ حق کی پہلی سالگرہ پر قوم کو مبارکباد پیش کی۔
بیان میں کہا گیا کہ یہ دن قومی یکجہتی، احترام اور قربانیوں کے اعتراف کے جذبے کے ساتھ منایا جا رہا ہے، جبکہ افواجِ پاکستان ہمیشہ عوام کے شانہ بشانہ کھڑی رہیں گی۔
آئی ایس پی آر کے مطابق معرکۂ حق پاکستان کی عسکری تاریخ کا ایک اہم سنگ میل ثابت ہوا، جس نے قومی عزم، پیشہ ورانہ مہارت اور حکمت عملی کی پختگی کو دنیا کے سامنے واضح کیا۔
بیان میں کہا گیا کہ معرکۂ حق کی کامیابی نے نہ صرف قوم کے اعتماد کو مزید مضبوط کیا بلکہ پاکستان کو ایک ذمہ دار اور مستحکم علاقائی قوت کے طور پر بھی اجاگر کیا، جو مؤثر دفاعی صلاحیتوں کا حامل ملک ہے۔
افواجِ پاکستان نے کہا کہ معرکۂ حق کے دوران پاکستان کے بروقت اور مؤثر ردعمل نے دشمن کی سازشوں، فالس فلیگ بیانیے اور گمراہ کن پروپیگنڈے کو بے نقاب کیا، جس کے نتیجے میں دشمن کو عالمی سطح پر شدید سفارتی اور اخلاقی دباؤ کا سامنا کرنا پڑا۔
آئی ایس پی آر کے مطابق روایتی خطرات کے ساتھ ساتھ پراکسی دہشت گردی اور ہائبرڈ وارفیئر جیسے چیلنجز کے باوجود مسلح افواج نے زمینی، فضائی، بحری، سائبر اور معلوماتی شعبوں میں اعلیٰ آپریشنل صلاحیت کا مظاہرہ کیا۔
بیان میں مزید کہا گیا کہ معرکۂ حق کے بعد پاکستان نے اپنی دفاعی تیاریوں اور مکمل سپیکٹرم ڈیٹرنس کو مزید مضبوط بنایا ہے تاکہ ہر ممکن خطرے کا مؤثر جواب دیا جا سکے۔
عسکری قیادت نے اس کامیابی کو افواجِ پاکستان کی تیاری، قربانیوں، پیشہ ورانہ مہارت اور قومی خدمت کے جذبے کا عملی ثبوت قرار دیا۔
آئی ایس پی آر نے اپنے بیان میں جنوبی ایشیا میں امن کے حوالے سے پاکستان کے مؤقف کو دہراتے ہوئے کہا کہ خطے میں پائیدار امن صرف بامعنی مذاکرات، باہمی احترام، انصاف اور بین الاقوامی قوانین کی پاسداری سے ہی ممکن بنایا جا سکتا ہے۔
بیان کے اختتام پر کہا گیا کہ قوم کی غیر متزلزل حمایت کے ساتھ افواج پاکستان ملک کی سلامتی، استحکام اور علاقائی سالمیت کے تحفظ کے لیے ہر وقت تیار ہیں اور ہر داخلی و خارجی چیلنج کا بھرپور مقابلہ کریں گی۔
