پاکستانی اداکارہ ہانیہ عامر نے موسیقی کی دنیا میں قدم رکھتے ہوئے اپنا پہلا گانا ’پابلو‘ ریلیز کر دیا، جس میں انہوں نے اپنے ناقدین اور مخالفین کو دوٹوک انداز میں جواب دیا ہے۔ پنجابی ہپ ہاپ انداز میں پیش کیے گئے اس گانے کی کہانی اور کمپوزیشن بھی ہانیہ عامر نے خود تیار کی ہے۔
’پابلو‘ کا آغاز پیانو کی دھن سے ہوتا ہے، جس کے بعد ہانیہ عامر اپنی مقبولیت، شخصیت اور اپنے بارے میں ہونے والی تنقید کا جواب پنجابی ہپ ہاپ کے انداز میں دیتی ہیں۔ گانے میں وہ ان لوگوں کو مخاطب کرتی ہیں جو ان کی خوبصورتی کو بناوٹی قرار دیتے یا ان کے محتاط رویے پر سوال اٹھاتے ہیں۔ ہانیہ کا کہنا ہے کہ وہ اپنی زندگی میں پرسکون ہیں، جبکہ ان کے مخالفین مسلسل ان سے الجھنے کی کوشش کرتے ہیں۔
مزید اپڈیٹس کیلئے وٹس ایپ چینل فالو کریں: چینل لنک
گانے میں ہانیہ عامر نے اپنے ’پنڈی اٹیٹیوڈ‘ کا بھی ذکر کیا ہے اور اپنی مقبولیت کی طرف اشارہ کرتے ہوئے کہا کہ وہ جہاں بھی جاتی ہیں، مداح ان کے ساتھ موجود ہوتے ہیں۔ انہوں نے یہ بھی کہا کہ وہ انٹرویوز نہیں دیتیں، لیکن اس کے باوجود خبروں میں رہتی ہیں۔ گانے کے ذریعے اداکارہ نے ناقدین کو مشورہ دیا کہ وہ ان سے نفرت میں اپنی توانائیاں ضائع کرنے کے بجائے اپنی زندگی پر توجہ دیں۔
’پابلو‘ کا ایک خاصا دلچسپ حصہ اس کا اختتامی حصہ ہے، جہاں بھارتی ریئلٹی ٹی وی اسٹار راکھی ساونت ہانیہ عامر کے لیے خصوصی پیغام دیتی ہیں۔ راکھی ساونت نے ہانیہ کی حوصلہ افزائی کرتے ہوئے انہیں خوبصورت اور مضبوط قرار دیا اور کہا کہ لوگ ان کی خوبصورتی سے جلتے ہیں۔ انہوں نے ہانیہ کو ’شیرنی‘ بھی کہا اور مخالفین کا بہادری سے سامنا کرنے کا پیغام دیا۔
مزید اپڈیٹس کیلئے وٹس ایپ چینل فالو کریں: چینل لنک
یوں ہانیہ عامر نے اپنے پہلے گانے ’پابلو‘ کے ذریعے صرف موسیقی کے میدان میں قدم نہیں رکھا بلکہ اپنی شخصیت، مقبولیت اور ناقدین کے بارے میں اپنے مؤقف کو بھی منفرد انداز میں پیش کیا ہے۔ گانے کا مرکزی پیغام یہی ہے کہ وہ تنقید سے واقف ضرور ہیں، لیکن مخالفین کی نفرت کو اپنی زندگی پر حاوی نہیں ہونے دیتیں۔
