ترک صدر طیب ایردوان نے جسٹس اینڈ ڈیولپمنٹ پارٹی کے ممبر پارلیمنٹ کو اسپیکر منتخب ہونے پر مبارک باد دی ہے۔ مصطفیٰ سیندوپ کو ٹیلی فون پر مبارکباد دیتے ہوئے صدر طیب ایردوان نے کہا کہ وہ پارلیمنٹ میں تمام دیگر سیاسی جماعتوں کے متفقہ نمائندے کے طور پر کام کریں گے۔ ترک صدر نے اپنی اتحادی سیاسی جماعتوں کا بھی شکریہ ادا کیا جنہوں نے مصطفیٰ سیندوپ کو اسپیکر منتخب کرنے کیلئے اپنا وٹ دیا۔
واضح رہے کہ مصطفیٰ سیندوپ کو 600 ارکان کے ہاؤس میں سے 328 ووٹ ملے۔ مجموعی طور پر 557 اراکین نے ووٹ کاسٹ کیا جس میں سے 7 ووٹ مسترد کئے گئے۔
پارلیمنٹ میں صدر طیب ایردوان کی سیاسی جماعت جسٹس اینڈ ڈیولپمنٹ پارٹی کے پاس 291 سیٹیں ہیں۔ ری پبلکنز پیپلز پارٹی کی 138 اور پیپلز ڈیموکریٹک پارٹی کی 58 ، نیشنل موومنٹ پارٹی کی 49 اور گڈ پارٹی کے پاس 37 سیٹیں ہیں۔ ترک پارلیمنٹ کے نومنتخب اسپیکر سیندوپ نے استنبول یونیورسٹی سے قانون کی ڈگری حاصل کی ہے۔
