برطانیہ کے وزیرِ اعظم نے فیفا سے مطالبہ کیا ہے کہ وہ فٹبال ورلڈ کپ 2026 کے سیمی فائنل کے بعد ارجنٹینا کی قومی ٹیم کی جانب سے متنازع سیاسی بینر لہرانے کے معاملے کی تحقیقات کرے۔ برطانوی حکومت کا مؤقف ہے کہ کھیل کو سیاسی پیغامات کے لیے استعمال نہیں کیا جانا چاہیے۔
یہ تنازع اس وقت سامنے آیا جب ارجنٹینا نے سیمی فائنل میں انگلینڈ کو ایک کے مقابلے میں دو گول سے شکست دینے کے بعد جشن مناتے ہوئے ایک بینر اٹھایا، جس پر ہسپانوی زبان میں "لاس مالویناس سون ارخینتیناس” (مالویناس ارجنٹینا کا حصہ ہیں) تحریر تھا۔ "مالویناس” جنوبی بحرِ اوقیانوس میں واقع انہی جزائر کا ہسپانوی نام ہے جنہیں دنیا فاک لینڈز جزائر کے نام سے جانتی ہے۔ ان جزائر پر کئی دہائیوں سے برطانیہ اور ارجنٹینا دونوں اپنی خودمختاری کا دعویٰ کرتے ہیں۔
میچ کے بعد ارجنٹینا کے کئی کھلاڑی، جن میں جیووانی لو سیلسو، لیساندرو مارٹینیز اور نکولس اوٹامیندی شامل تھے، مذکورہ بینر کے ساتھ جشن مناتے ہوئے نظر آئے، بعد ازاں انہوں نے اسے اسٹیڈیم کے میدان میں بچھا دیا۔ تاہم یہ واضح نہیں ہو سکا کہ بینر کھلاڑی خود ساتھ لائے تھے یا اسے شائقین سے حاصل کیا گیا تھا۔
برطانوی وزیرِ اعظم کے ترجمان نے اس اقدام پر ردِعمل دیتے ہوئے کہا کہ "ورلڈ کپ شاید ہمارا نہ ہو، لیکن فاک لینڈز یقیناً ہمارے ہیں۔” انہوں نے اس بات پر بھی زور دیا کہ سیاست کو فٹبال سے دور رہنا چاہیے اور فیفا سے معاملے کی تحقیقات کا مطالبہ کیا۔
فیفا کے 2026 ورلڈ کپ ضابطۂ اخلاق کے مطابق اسٹیڈیم میں سیاسی، توہین آمیز یا امتیازی نوعیت کے بینرز، جھنڈوں یا دیگر مواد کی نمائش ممنوع ہے۔ اسی طرح انٹرنیشنل فٹبال ایسوسی ایشن بورڈ (آئی ایف اے بی) کے قوانین بھی کھلاڑیوں کو میدان میں سیاسی، مذہبی یا ذاتی نوعیت کے پیغامات دینے سے روکتے ہیں۔ ان قوانین کی خلاف ورزی کی صورت میں فیفا یا متعلقہ منتظمین کھلاڑیوں یا ٹیم کے خلاف تادیبی کارروائی کر سکتے ہیں۔
فاک لینڈز جزائر جنوبی بحرِ اوقیانوس میں واقع برطانوی زیرِ انتظام علاقہ ہیں، تاہم ارجنٹینا انہیں "مالویناس” کے نام سے اپنی سرزمین قرار دیتا ہے۔ دونوں ممالک کے درمیان 1982 میں انہی جزائر پر جنگ بھی لڑی گئی تھی، جس کے بعد برطانیہ نے دوبارہ ان کا کنٹرول حاصل کر لیا، جبکہ ارجنٹینا آج بھی ان پر اپنا دعویٰ برقرار رکھے ہوئے ہے۔
ارجنٹینا 19 جولائی کو ورلڈ کپ کے فائنل میں اسپین کے مدمقابل ہوگا، تاہم میدان سے باہر فاک لینڈز کے متنازع بینر پر اٹھنے والا تنازع بھی آئندہ دنوں میں عالمی فٹبال حلقوں میں زیرِ بحث رہنے کا امکان ہے۔
