راولپنڈی: عیدالاضحیٰ کے پُرمسرت موقع پر پاکستان کی مسلح افواج کے سربراہان نے پوری پاکستانی قوم کو دلی مبارکباد اور نیک تمنائیں پیش کرتے ہوئے ملکی امن، استحکام اور خوشحالی کیلئے خصوصی دعائیں کی ہیں۔
پاک فوج کے شعبۂ تعلقاتِ عامہ (آئی ایس پی آر) کی جانب سے جاری بیان کے مطابق فیلڈ مارشل سید عاصم منیر، چیف آف آرمی اسٹاف و چیف آف ڈیفنس اسٹاف، ایڈمرل نوید اشرف، چیف آف دی نیول اسٹاف، اور ایئر چیف مارشل ظہیر احمد بابر سدھو، چیف آف دی ایئر اسٹاف نے اپنے مشترکہ پیغام میں کہا کہ عیدالاضحیٰ قربانی، ایمان، ایثار اور قومی یکجہتی کی عظیم علامت ہے۔
مسلح افواج کے سربراہان نے پاکستانی عوام کے جذبۂ حب الوطنی، عزم اور قربانیوں کو خراج تحسین پیش کرتے ہوئے کہا کہ قوم نے ہر مشکل وقت میں اتحاد اور حوصلے کی مثال قائم کی ہے۔ بیان میں شہداء، مسلح افواج، قانون نافذ کرنے والے اداروں اور ان تمام شہریوں کی خدمات کو بھی سراہا گیا جو وطن کے دفاع اور امن کے قیام کیلئے مسلسل کردار ادا کر رہے ہیں۔
آئی ایس پی آر کے مطابق پاکستان کی مسلح افواج ملک کی خودمختاری اور علاقائی سالمیت کے دفاع کیلئے اپنے عزم پر ثابت قدم ہیں اور ہر قسم کے خطرات کے مقابلے کیلئے پوری طرح تیار ہیں۔ بیان میں کہا گیا کہ افواج پاکستان ہمیشہ قوم کے شانہ بشانہ کھڑی رہیں گی اور امن و استحکام کے قیام کیلئے اپنا کردار ادا کرتی رہیں گی۔
اس موقع پر شہدائے پاکستان کے اہلِ خانہ کو خصوصی خراج عقیدت پیش کرتے ہوئے کہا گیا کہ شہداء کی بے مثال قربانیوں نے وطن عزیز کی بنیادوں کو مزید مضبوط بنایا ہے اور پوری قوم اپنے بہادر سپوتوں کی قربانیوں کو ہمیشہ یاد رکھے گی۔
مسلح افواج کے سربراہان نے دعا کی کہ عیدالاضحیٰ پاکستانی قوم کیلئے خوشیوں، اتحاد اور امن کا پیغام لے کر آئے اور ملک مزید ترقی و استحکام کی جانب گامزن ہو۔
