صدر ایردوان کا کہنا ہے کہ بحیرہ اسود اناج معاہدے کو در پیش مسائل کو حل کرتے ہوئے دوبارہ شروع کیا جانا چاہیے۔
صدر ایردوان نے اپنے روسی ہم منصب ولادیمیر پیوٹن کے ساتھ مشترکہ نیوز کانفرنس سے خطاب کرتے ہوئے کہا کہ ہم سمجھتے ہیں کہ اس اقدام کو اس کی خامیوں کو دور کرتے ہوئے جاری رکھا جانا چاہیے۔
صدر ایردوان روس کے ساحلی شہر سوچی کے ایک روزہ دورے پر ہیں جہاں وہ پیوٹن کے ساتھ موجودہ علاقائی اور عالمی مسائل کے ساتھ ساتھ دو طرفہ تعلقات پر بات چیت کر رہے ہیں۔
گزشتہ سال کے تاریخی بحیرہ اسود کے اناج کے معاہدے کی بحالی جس نے خوراک کے عالمی بحران کو کم کرنے میں مدد کی تھی اس اجلاس میں سرفہرست مسئلہ تھا۔
اس جولائی میں روس نے ترکیہ اور اقوام متحدہ کی ثالثی میں ہونے والے اس معاہدے میں اپنی شرکت کو معطل کر دیا تھا تاکہ یوکرین کی تین بلیک سی بندرگاہوں سے اناج کی برآمدات دوبارہ شروع کی جا سکیں جو فروری 2022 میں شروع ہونے والی یوکرین کی جنگ کے بعد روک دی گئی تھیں۔
ماسکو نے شکایت کی ہے کہ مغرب روس کی اپنی اناج کی برآمدات پر اپنی ذمہ داریوں کو پورا کرنے میں ناکام رہا ہے، اور یہ کہ یوکرین کا اناج ضرورت مند ممالک کو نہیں جا رہا ہے۔
اس کا کہنا ہے کہ ادائیگیوں، لاجسٹکس اور انشورنس پر پابندیاں اس کی ترسیل کی راہ میں رکاوٹ بنی ہوئی ہیں۔
اپنے اناج اور کھاد کی برآمدات کے لیے روس کے مطالبات کو پورا کرنے کی اہمیت کی تصدیق کرتے ہوئے، ترکیہ کا کہنا ہے کہ اس اقدام کا کوئی متبادل نہیں ہے۔
صدر ایردوان کا کہنا تھا کہ اناج کے معاہدے کے تجویز کردہ متبادل فریقین کے درمیان تعاون پر مبنی ایک پائیدار، محفوظ اور مستقل ماڈل پیش نہیں کر سکتے۔
انکا کہنا تھا کہ اس معاہدے نے خوراک کے عالمی بحران سے نمٹنے میں "کلیدی کردار” ادا کیا ہے، انہوں نے مزید کہا کہ یہ افریقہ کی طرح ضرورت مند ملکوں کے لیے "سانس لینے والی ٹیوب” کی طرح کام کرتا ہے۔
صدر ایردوان نے کہا کہ ہم چاہتے ہیں کہ بین الاقوامی قانون کی بنیاد پر دیرپا اور منصفانہ امن کے ساتھ جاری تنازعات کو جلد از جلد ختم کیا جائے۔
انقرہ جولائی 2022 کے معاہدے کی بحالی کے لیے شدید سفارتی کوششیں کر رہا ہے اور اس نے کیف اور ماسکو سے بھی بات چیت کے ذریعے جنگ ختم کرنے کا مطالبہ کیا ہے۔
