پاکستان میں افغانستان کے سفیر سردار احمد شکیب نے کہا ہے کہ افغانستان اور پاکستان محض دو ہمسایہ ممالک نہیں بلکہ دونوں کی جغرافیائی، تاریخی اور سماجی وابستگیاں بہت گہری ہیں اور خطے میں استحکام اور خوشحالی کے لیے بہتر رابطوں اور باہمی تعاون کی ضرورت ہے۔
پاکستان کے دارالحکومت اسلام آباد میں نیشنل ڈیفنس یونیورسٹی سے خطاب کرتے ہوئے افغان سفیر نے کہا کہ دونوں ممالک کے عوام اور معاشروں کے درمیان گہرے تعلقات موجود ہیں جبکہ ان کی تاریخ بھی کئی حوالوں سے ایک دوسرے سے جڑی ہوئی ہے۔
ان کا کہنا تھا کہ تجارت، ٹرانزٹ اور لوگوں کی سرحد پار آمدورفت دونوں ممالک کی معیشتوں اور معاشروں کو ایک دوسرے سے منسلک کرتی ہے۔
سردار احمد شکیب کے مطابق گزشتہ کئی دہائیوں کے دوران جنگوں اور سکیورٹی سے متعلق پیش رفت نے افغانستان اور پاکستان کے سکیورٹی معاملات کو بھی ایک دوسرے سے جوڑ دیا ہے۔
انہوں نے کہا کہ دونوں ممالک تنازعات کے اثرات برداشت کر چکے ہیں، تاہم ان کے مستقبل کا راستہ تقسیم کے بجائے تعاون سے گزرتا ہے۔
افغان سفیر نے علاقائی روابط کو مضبوط بنانے پر زور دیتے ہوئے کہا کہ باہمی انحصار اور تعاون خطے میں استحکام اور معاشی خوشحالی کے لیے اہم ہیں۔
