اسلام آباد میں اقتصادی تعاون تنظیم (ای سی او) کے 30ویں وزرائے خارجہ اجلاس میں رکن ممالک نے علاقائی و معاشی تعاون کے فروغ کے لیے 2035 تک کا اسٹریٹجک لائحہ عمل اور مشترکہ اعلامیہ منظور کر لیا ہے۔ پاکستان کی میزبانی میں ہونے والے اجلاس میں تجارت، توانائی، ٹرانسپورٹ روابط، علاقائی سلامتی اور معاشی استحکام سمیت اہم معاملات زیرِ بحث آئے۔ شرکا نے اس بات پر زور دیا کہ خطے کے قدرتی وسائل، جغرافیائی اہمیت اور تجارتی امکانات کو مشترکہ منصوبوں اور بہتر رابطوں کے ذریعے معاشی ترقی میں تبدیل کیا جائے۔
مزید اپڈیٹس کیلئے وٹس ایپ چینل فالو کریں: چینل لنک
پاکستان کے نائب وزیراعظم اور وزیر خارجہ اسحاق ڈار نے اجلاس کی صدارت کی۔ پاکستان نے 2026-27 کے لیے ای سی او کی چیئرمین شپ بھی سنبھال لی ہے۔ اسحاق ڈار نے تنظیم کے آئندہ دور کے لیے پاکستان کی 5 ترجیحات بیان کیں، جن میں تجارت اور سرمایہ کاری میں اضافہ، علاقائی رابطوں کی بہتری، ای سی او تجارتی معاہدے کو مؤثر بنانا، قدرتی آفات سے نمٹنے کی مشترکہ تیاری اور انسانی ترقی شامل ہیں۔ ان کا کہنا تھا کہ وسطی ایشیا کو جنوبی ایشیا اور بحیرۂ عرب کی بندرگاہوں سے ملانے کے لیے ٹرانسپورٹ راہداریوں، سرحدی کارروائیوں میں آسانی اور مؤثر کسٹمز نظام کو فروغ دینا ضروری ہے۔ انہوں نے تعلیم، تحقیق، نوجوانوں کی فنی تربیت اور موسمیاتی تبدیلی سے نمٹنے کے لیے بھی علاقائی تعاون بڑھانے پر زور دیا۔

افغانستان کے معاملے پر اسحاق ڈار نے کہا کہ پاکستان ایک پُرامن، مستحکم اور خوشحال افغانستان کا خواہاں ہے، تاہم بامعنی علاقائی تعاون کے لیے افغان حکام کو ہمسایہ ممالک کے سکیورٹی خدشات، بالخصوص دہشت گردی کے مسئلے پر توجہ دینا ہوگی۔ انہوں نے کہا کہ امن اور ترقی ایک دوسرے سے جڑے ہیں اور خطے میں عدم استحکام تجارتی راستوں، توانائی کی فراہمی اور سرمایہ کاری کو متاثر کرتا ہے۔ ان کے مطابق علاقائی رابطوں کے لیے صرف سڑکیں اور تجارتی راستے کافی نہیں، بلکہ ممالک کے درمیان اعتماد اور معاہدوں کی پاسداری بھی ضروری ہے۔
ایران کے وزیر خارجہ عباس عراقچی نے تجارت، ٹرانسپورٹ اور توانائی کو علاقائی تعاون کے 3 بنیادی ستون قرار دیا۔ انہوں نے ای سی او تجارتی معاہدے کو جدید اور مؤثر بنانے، رکن ممالک کے درمیان توانائی کے مستحکم نظام اور مشترکہ علاقائی سکیورٹی فریم ورک کی ضرورت پر زور دیا۔ عراقچی نے آبنائے ہرمز اور باب المندب میں ممکنہ رکاوٹوں کو توانائی کی عالمی فراہمی کے لیے اہم خطرہ قرار دیا۔ انہوں نے امریکہ اور اسرائیل کی ایران کے خلاف کارروائیوں پر تنقید کرتے ہوئے کہا کہ ایران سفارت کاری اور پُرامن حل کے لیے پرعزم ہے۔ انہوں نے غزہ اور مغربی کنارے کی صورتِ حال پر بھی تشویش ظاہر کی اور فلسطینیوں کے لیے خوراک، ادویات اور امداد کی بلا رکاوٹ فراہمی کا مطالبہ کیا۔
ترکیہ کے نائب وزیر خارجہ موسیٰ کلاکلیکایا نے ای سی او کو علاقائی تعاون کے وسیع امکانات رکھنے والا پلیٹ فارم قرار دیا۔ ان کا کہنا تھا کہ عالمی تنازعات، موسمیاتی تبدیلی اور سپلائی چین میں رکاوٹوں جیسے چیلنجز سے نمٹنے کے لیے سفارت کاری اور رکن ممالک کے درمیان مضبوط شراکت داری ضروری ہے۔

وسطی ایشیائی ممالک کے نمائندوں نے بھی علاقائی تجارت، سرمایہ کاری اور رابطوں کو مضبوط بنانے کی حمایت کی۔ قازقستان کے نائب وزیر خارجہ آرمان عیساگالیف نے عالمی معاشی تقسیم اور تجارتی نظام میں تبدیلیوں کے تناظر میں علاقائی منڈیوں کے درمیان روابط بڑھانے پر زور دیا۔ کرغزستان کے نائب وزیر خارجہ کائرات ترسونکولوف نے بدلتے عالمی حالات میں علاقائی امن اور استحکام کی اہمیت اجاگر کی، جبکہ ازبکستان کے نائب وزیر خارجہ بوبور عثمانوف نے پاکستان کے ساتھ تعاون اور ای سی او کے مشترکہ اہداف آگے بڑھانے کے عزم کا اظہار کیا۔ آذربائیجان کے نائب وزیر خارجہ النور محمدوف نے پاکستان کی چیئرمین شپ کی حمایت کی، جبکہ تاجکستان اور ترکمانستان کے نمائندوں نے بھی تنظیم کے تحت معاشی تعاون اور علاقائی روابط کے فروغ کو اہم قرار دیا۔

اجلاس میں افغانستان کی جانب سے کوئی نمائندہ شریک نہیں ہوا، حالانکہ وہ ای سی او کے 10 رکن ممالک میں شامل ہے۔ ڈان کی رپورٹ کے مطابق دفتر خارجہ کی جانب سے جاری کردہ وفود کی فہرست میں بھی افغانستان کا نام شامل نہیں تھا۔ میڈیا رپورٹس کے مطابق پاکستان نے دونوں ملکوں کے درمیان کشیدہ تعلقات کے باعث افغان طالبان حکومت کو اجلاس میں مدعو نہیں کیا تھا۔ افغانستان کی عدم شرکت اس لیے بھی اہم ہے کہ وسطی ایشیا کو جنوبی ایشیا اور بحیرۂ عرب کی بندرگاہوں سے ملانے والے تجارتی اور ٹرانزٹ راستوں میں اس کا جغرافیائی کردار اہمیت رکھتا ہے۔
مزید اپڈیٹس کیلئے وٹس ایپ چینل فالو کریں: چینل لنک

اجلاس کے اختتام پر اسحاق ڈار نے رکن ممالک پر زور دیا کہ منظور شدہ فیصلوں اور مشترکہ وعدوں کو عملی اقدامات میں تبدیل کیا جائے۔ ان کا کہنا تھا کہ 2035 تک کا اسٹریٹجک لائحہ عمل تنظیم کے آئندہ 10 برس کے لیے مشترکہ سمت متعین کرتا ہے، تاہم اس پر پیش رفت کے لیے واضح ترجیحات، قابلِ عمل اہداف اور مؤثر نگرانی ضروری ہوگی۔ پاکستان نے اپنی چیئرمین شپ کے دوران علاقائی رابطوں، تجارت اور معاشی تعاون کو عملی شکل دینے کے عزم کا اظہار کیا ہے۔ ایران 3 اور 4 دسمبر کو ای سی او کے 18ویں سربراہی اجلاس کی میزبانی کرے گا، جبکہ وزرائے خارجہ کا اگلا اجلاس 2027 میں ہوگا۔
