تیونس میں زیرِ حراست معروف سیاسی رہنما اور النہضہ تحریک کے سربراہ راشد الغنوشی کی صحت کے حوالے سے تشویش بڑھ گئی ہے۔ اپوزیشن اتحاد نیشنل سالویشن فرنٹ نے تیونسی حکام سے مطالبہ کیا ہے کہ راشد الغنوشی اور فرنٹ کے سربراہ احمد نجیب شابی کی صحت سے متعلق مکمل اور مستند معلومات عوام کے سامنے لائی جائیں۔
نیشنل سالویشن فرنٹ نے اتوار 26 جولائی کو جاری کیے گئے ایک بیان میں کہا کہ وہ دونوں سیاسی رہنماؤں کی صحت کے بارے میں سامنے آنے والی خبروں کو تشویش کی نگاہ سے دیکھ رہا ہے۔
فرنٹ کے مطابق حکام کی جانب سے صورتحال پر کوئی واضح سرکاری وضاحت جاری نہیں کی گئی، جبکہ راشد الغنوشی کے اہلِ خانہ اور ان کی قانونی دفاعی ٹیم کو ملاقات اور ان کی طبی حالت جانچنے کی اجازت بھی نہیں دی جا رہی۔
تنظیم کا کہنا ہے کہ معلومات کی عدم فراہمی نے صورتحال کو مزید غیر یقینی بنا دیا ہے، جس کے باعث مختلف افواہیں جنم لے رہی ہیں۔
سوشل میڈیا پر راشد الغنوشی کے انتقال سے متعلق خبریں بھی گردش کرتی رہیں، تاہم بعض ذرائع نے ان اطلاعات کی تردید کرتے ہوئے کہا کہ وہ اسپتال میں زیرِ علاج ہیں اور ان کی حالت مستحکم ہے۔
راشد الغنوشی کی دفاعی ٹیم کے رکن مختار جمائی نے دعویٰ کیا ہے کہ ان کی صحت انتہائی خراب ہے اور ان کی حالت مسلسل بگڑ رہی ہے۔ ان کے مطابق موجودہ صورتحال پر فوری توجہ کی ضرورت ہے۔
دوسری جانب النہضہ تحریک کے رہنما ریاض شعیبی نے کہا کہ راشد الغنوشی کی صحت کے بارے میں مختلف اور متضاد اطلاعات سامنے آ رہی ہیں، لیکن درست معلومات صرف تیونسی حکام کے پاس موجود ہیں۔
انہوں نے کہا کہ ملاقاتوں پر پابندی اور سرکاری خاموشی کے باعث شکوک و شبہات میں اضافہ ہو رہا ہے۔ ان کا کہنا تھا کہ حکام کو چاہیے کہ وہ راشد الغنوشی کی اصل طبی صورتحال سے عوام اور ان کے اہلِ خانہ کو آگاہ کریں۔
نیشنل سالویشن فرنٹ نے بھی سیاسی قیدیوں کی صحت سے متعلق پیدا ہونے والی غیر یقینی صورتحال کا ذمہ دار تیونسی حکام کو قرار دیتے ہوئے مطالبہ کیا ہے کہ فوری طور پر حقائق سامنے لائے جائیں۔
راشد الغنوشی طویل عرصے سے تیونس کی سیاست میں ایک اہم کردار ادا کرتے رہے ہیں۔ وہ النہضہ تحریک کے بانی رہنماؤں میں شامل ہیں اور ملک میں ہونے والی سیاسی تبدیلیوں کے دوران ان کا کردار نمایاں رہا ہے
