صدر رجب طیب ایردوان نے کہا ہے کہ ترکیہ خطے میں بڑھتی ہوئی کشیدگی کو کم کرنے اور ایران و امریکہ کے درمیان جاری نازک جنگ بندی کو برقرار رکھنے کے لیے فعال سفارتی کردار ادا کر رہا ہے۔
انقرہ میں پارلیمنٹ کے ہفتہ وار اجلاس سے خطاب کرتے ہوئے صدر رجب طیب ایردوان نے کہا کہ ترکیہ کشیدگی کم کرنے، جنگ بندی کو طول دینے اور مذاکرات کے تسلسل کے لیے ضروری سفارتی رابطے اور کوششیں جاری رکھے ہوئے ہے۔
انہوں نے خبردار کیا کہ ایسے عناصر کو موقع نہیں دیا جا سکتا جو جنگ بندی کو نقصان پہنچانا چاہتے ہیں۔ ان کے مطابق اسرائیلی حکومت، جو اس جنگ بندی سے خوش نہیں، اسے سبوتاژ کرنے کی کوشش کر سکتی ہے، تاہم عالمی برادری کو اسے روکنا ہوگا۔
صدر ایردوان نے کہا کہ مذاکرات بند مٹھیوں سے نہیں کیے جا سکتے، اور اس موقع کو ضائع نہیں ہونے دینا چاہیے جو جنگ بندی نے فراہم کیا ہے۔ ان کا کہنا تھا کہ خطے میں پائیدار امن کے لیے بات چیت اور سفارتکاری کو ہتھیاروں پر فوقیت دینا ہوگی۔
انہوں نے کہا کہ ترکیہ نہ صرف خطے بلکہ عالمی سطح پر بھی امن کے لیے اپنی سفارتی کوششیں جاری رکھے گا اور “امن کی آواز” بن کر اپنا کردار ادا کرتا رہے گا۔
اسی خطاب میں انہوں نے اسپین کے وزیراعظم پیڈرو سانچیز کے غزہ کے حوالے سے مؤقف کو سراہا اور فلسطینی عوام کے ساتھ ترکیہ کی حمایت کا اعادہ کیا۔
صدر ایردوان نے کہا کہ اگر خطے میں امن قائم ہونا ہے تو وہ اسرائیلی حکومت کی پالیسیوں کے باوجود ہوگا، اور ترکیہ ظلم کے خلاف آواز بلند کرتا رہے گا، چاہے وہ غزہ ہو، مغربی کنارے یا لبنان۔
ادھر ترک وزارت خارجہ نے اسرائیلی وزیراعظم کی جانب سے صدر ایردوان کے خلاف دیے گئے بیانات کی سخت مذمت کرتے ہوئے انہیں خطے میں جاری امن کوششوں کو نقصان پہنچانے کے مترادف قرار دیا ہے۔
وزارت نے بین الاقوامی فوجداری عدالت کی جانب سے اسرائیلی وزیراعظم کے خلاف جنگی جرائم سے متعلق وارنٹ کا حوالہ دیتے ہوئے کہا کہ ایسے بیانات حقائق کو چھپانے کی کوشش ہیں، جبکہ ترکیہ خطے میں متاثرہ شہریوں کی حمایت اور احتساب کے اصول پر قائم ہے۔
ترکیہ نے فلسطین میں انسانی امدادی سرگرمیوں کے لیے خصوصی رابطہ کار بھی تعینات کیا ہے، جو غزہ میں امدادی کارروائیوں اور بین الاقوامی شراکت داروں کے ساتھ تعاون کو منظم کرے گا۔
