4 مارچ کو ٹرین استنبول سے اسلام آباد کے لئے روانہ ہو گی
نو سال کے وقفے کے بعد ترکی اور پاکستان کے درمیان کارگو ٹرین دوبارہ بحال ہو رہی ہے۔ پاکستان کی وزارت ریلویز کا کہنا ہے کہ 4 مارچ کو استنبول سے تجارتی سامان لے کر کارگو ٹرین اسلام آباد کے لئے روانہ ہو گی جو ایران سے ہوتی ہوئی پاکستان پہنچے گی۔
استنبول سے 4 مارچ کو سفر شروع کرنے والی کارگو ٹرین 12 روز بعد 16 مارچ کو اسلام آباد کے ڈرائی پورٹ پر پہنچے گی۔ یہ ٹرین ایران کے شہر زاہدان سے کوئٹہ اور پھر اسلام آباد آئے گی۔ ٹرین 12 روز میں مجموعی طور پر ساڑھے چھ ہزار کلومیٹر فاصلہ طے کرے گی۔
پاکستان نے ترکی سے آنے والی کارگو ٹرین سے متعلق اکنامک کوآرڈیشن آرگنائزیشن (ای سی او) سے رابطہ کر لیا ہے۔ اس کے ساتھ ساتھ ایرانی حکام کو بھی آگاہ کر دیا گیا ہے۔
استنبول سے اسلام آباد پہنچنے والی ٹرین واپس 19 مارچ کو روانہ ہو گی۔ پاکستان کے وزیر ریلویز اعظم خان سواتی استنبول سے آنے والی کارگو ٹرین کا استقبال کریں گے۔
واضح رہے ترکی اور پاکستان کے درمیان پہلی کارگو ٹرین 14 اگست 2009 میں شروع ہوئی تھی۔ آخری کارگو ٹرین اسلام آباد سے استنبول کے لئے 5 نومبر 2011 کو روانہ ہوئی تھی۔ 2009 میں شروع ہونے والی کارگو ٹرین سروس کے تحت ترکی سے پاکستان میں چھ کارگو ٹرینیں آئیں۔ ترکی سے آخری کارگو ٹرین 9 دسمبر 2011 کو پہنچی تھی جس کے بعد دونوں ملکوں کے درمیان کارگو ٹرین سروس معطل ہو گئی تھی۔ ایک دہائی بعد دوبارہ شروع ہونے والی کارگو ٹرین ہر مہینے کی پہلی جمعرات کو روانہ ہو گی۔ اس ٹرین کی لمبائی 420 میٹر ہو گی۔ ایران، ترکی اور پاکستان کے درمیان ہونے والے نئے معاہدے کے تحت استنبول کے ریلوے اسٹیشن سے روانہ ہونے والی کارگو ٹرین ایران تک 90 گھنٹے اور ایران سے پاکستان تک 135 گھنٹے سفر کرے گی۔
