صدر پاکستان ڈاکٹر عارف علوی نے غزہ میں ہسپتال پر وحشیانہ اسرائیلی فضائی حملے کی مذمت کرتے ہوئےفوری طور پر جنگ بندی کا مطالبہ کیاہے۔
انکا کہنا تھا کہ صرف دو ریاستی حل اور آزاد فلسطینی ریاست کے قیام سے ہی خطے میں پھیلتی اِن مجرمانہ کارروائیوں کو حل کیا جاسکتا ہے ۔
صدر پاکستان نے غزہ میں ہسپتال پر اسرائیلی حملے کے نتیجے میں خواتین اور بچوں سمیت سینکڑوں افراد کے جاں بحق ہونے پر اظہارِ مذمت کیا۔
صدر پاکستان نے اسرائیلی فضائی حملے کے نتیجے میں معصوم جانوں کے المناک نقصان پرگہرے افسوس کا اظہار کیا۔
انہوں نے کہا کہ اسرائیل نے ہزاروں افراد کے قتل اور پھر ایک ہسپتال پر حملہ کر کے تمام بین الاقوامی اور اخلاقی اصولوں کو پامال کیا۔
صدر پاکستان نےاسرائیل کی طرف سے سنگین جنگی جرائم کے مسلسل ارتکاب پر تشویش کا اظہارکیا۔
صدر پاکستان ڈاکٹر عارف علوی نے کہا کہ اسرائیل شہری آبادیوں اور صحت کی سہولیات کو بلاامتیاز نشانہ بنا رہا ہے، عالمی برادری اسرائیل کو اس کے جنگی جرائم پر جوابدہ ٹھہرائے اور اسرائیلی بمباری اور غزہ کے جاری محاصرے کو فوری طور پر روکنے کے لیے فوری اقدامات کرے۔
