برطانیہ کے وزیر خارجہ ڈومینک راب دو روزہ دوے پر پاکستان پہنچ گئے ہیں اور اس دوران اعلیٰ حکام کے ساتھ افغانستان کی صورت حال اور دو طرفہ تعلقات پر تبادلہ خیال کریں گے۔
دفتر خارجہ کے مطابق برطانوی وزیر خارجہ ڈومینک راب قطر سے نورخان ایئربیس پہنچے جہاں وزارت خارجہ اور برطانوی ہائی کمیشن کے عہدیداروں نے ان کا استقبال کیا۔
اس سے قبل ترجمان دفتر خارجہ نے اپنے بیان میں کہا تھا کہ شاہ محمود قریشی دورے پر آئے برطانوی ہم منصب سے سرکاری سطح پر باقاعدہ تبادلہ خیال کریں گے، جن کی ملاقاتیں دیگر اعلیٰ حکام سے بھی طے ہیں۔
بیان میں کہا گیا کہ پاکستان اور برطانیہ حال ہی میں افغانستان میں ہونے والی پیش رفت پر مصروف عمل ہیں اور دونوں ممالک کے رہنماؤں نے گزشتہ ایک ماہ کے دوران جنگ زدہ ملک کے حوالے سے متعدد مرتبہ تبادلہ خیال کیا ہے۔
پاکستان کے دفتر خارجہ کا کہنا تھا کہ برطانوی وزیر خارجہ کے دورے سے دونوں ممالک کے درمیان اعلیٰ سطح پر تبادلوں کو مزید فروغ ملے گا اور کئی مسائل پر دوطرفہ تعاون کو مضبوط کرنے میں مدد ملے گی۔
گزشتہ ماہ وزیر اعظم عمران خان کو ان کے برطانوی اہم منصب بورس جانسن کی جانب سے ٹیلی فون کیا گیا تھا اور اس موقع پر دونوں رہنماؤں نے افغانستان کے حوالے سے اپنے خیالات کا تبادلہ کیا تھا اور بورس جانسن نے رابطوں کا بحال رکھنے پر اتفاق کیا تھا۔
وزیر خارجہ شاہ محمود قریشی اور ان کے برطانوی ہم منصب ڈومینک راب کے مابین بھی گزشتہ ماہ دو مرتبہ افغانستان کے حالات سے متعلق بات چیت ہوئی تھی۔
خیال رہے کہ 15 اگست کو افغانستان میں طالبان کے قبضے کے بعد برطانوی وزیر خارجہ سے قبل نیدرلینڈز کی وزیر خارجہ سِگرِد کاگ بھی افغانستان کی صورت حال پر تبادلہ خیال کے لیے پاکستان پہنچی تھیں۔
اس سے قبل گزشتہ ماہ کے آخر میں جرمن وزیر خارجہ ہیکو ماس بھی پاکستان آئے تھے، جنہوں نے وزیر خارجہ شاہ محمود قریشی اور وزیراعظم عمران خان سے ملاقات کی تھی۔
