وزیراعظم شہباز شریف سعودی عرب کے دورے پر روانہ ہو گئے جہاں وہ سعودی ولی عہد محمد بن سلمان سے ملاقات کریں گے۔ اس ملاقات میں مشرقِ وسطیٰ میں ایران کے خلاف امریکی اور اسرائیلی حملوں کے بعد پیدا ہونے والی کشیدہ صورتحال اور علاقائی سلامتی کے امور پر تبادلۂ خیال کیا جائے گا۔
دفتر خارجہ کے مطابق نائب وزیراعظم و وزیر خارجہ اسحاق ڈار بھی اس دورے میں وزیراعظم کے ہمراہ ہیں۔ ملاقات کے دوران پاکستان اور سعودی عرب کے درمیان دوطرفہ تعلقات کو مزید مضبوط بنانے اور باہمی تعاون کے فروغ پر بھی بات چیت ہوگی۔
حالیہ دنوں میں ایران پر امریکی اور اسرائیلی حملوں کے بعد خطے میں کشیدگی میں نمایاں اضافہ ہوا ہے۔ ایران نے جوابی کارروائی کرتے ہوئے خلیجی ممالک میں امریکی فوجی اڈوں اور اہداف کو نشانہ بنایا جبکہ اس نے آبنائے ہرمز کو بند کرنے کا اعلان بھی کیا، جس کے باعث عالمی منڈی میں تیل کی قیمتوں میں تیزی سے اضافہ دیکھنے میں آیا ہے۔
اس صورتحال کے پیش نظر پاکستان نے خطے میں کشیدگی کم کرنے کے لیے سفارتی رابطے تیز کر دیے ہیں۔ وزیراعظم شہباز شریف اور اسحاق ڈار مختلف علاقائی اور خلیجی ممالک کے رہنماؤں سے رابطوں کے ذریعے کشیدگی کم کرنے کی کوششیں کر رہے ہیں۔
دوسری جانب پاکستان کے چیف آف ڈیفنس فورسز عاصم منیر نے گزشتہ ہفتے سعودی وزیر دفاع خالد بن سلمان سے ملاقات کی جس میں ایران کے حملوں اور علاقائی سلامتی کے امور پر گفتگو کی گئی۔ یہ ملاقات پاکستان اور سعودی عرب کے درمیان گزشتہ سال طے پانے والے اسٹریٹجک باہمی دفاعی معاہدے کے تناظر میں اہم قرار دی جا رہی ہے۔
اسی دوران سعودی عرب نے جمعرات کو شائبہ آئل فیلڈ کی جانب آنے والے دو ڈرون مار گرائے۔ سعودی حکام کے مطابق یہ تنصیب ملک کی تیل کی پیداوار کے لیے انتہائی اہمیت رکھتی ہے اور اس پر حملوں کو ناکام بنا دیا گیا ہے۔
پاکستانی حکام کا کہنا ہے کہ اسلام آباد اور ریاض کے درمیان تعلقات باہمی اعتماد اور تعاون پر مبنی ہیں اور پاکستان ہر مشکل وقت میں سعودی عرب کے ساتھ کھڑا رہے گا۔
