تھائی لینڈ میں ورلڈ باکسنگ آرگنائزیشن کے تحت ورلڈ یوتھ ٹائٹل فائٹ کا اہتمام کیا گیا جس میں پاکستان کے عثمان وزیر نے میزبان ملک کے ریسلر سومپوت سیسا کو شکست دے کر پروفیشنل باکسنگ کا ٹائٹل اپنے نام کیا ۔ عثمان وزیر نے اپنے حریف کو چھٹے راؤنڈ میں ناک آؤٹ کر کے یہ ٹائٹک حاصل کیا ۔ پاکستان نے پہلی بار پروفیشنل باکسنگ میں ورلڈ ٹائٹل جیت لیا
بنکاک میں ہونے والی ورلڈ یوتھ ٹائٹل فائٹ کیلئے عثمان وزیر جب رنگ میں اترے تو ان کی پھرتی اور پنچنگ کے آگے حریف باکسر بے بس دکھائی دیا، پہلے راؤنڈ سے ہی عثمان تھائی باکسرسومپوت سیسا کو پریشر میں لے آئے تھے حالانکہ تھائی باکسر کو اپنے ہوم گراؤنڈ کا ایڈوانٹیج حاصل تھا مگر عثمان کا کھیل شاندار تھا انہوں نے سومپوت سیسا کو چھٹے راؤنڈ میں ناک آوٹ کرکے کامیابی حاصل کی۔
ورلڈ باکسنگ آرگنائزیشن کے تحت ہونے والے اس مقابلے میں انڈر 23 کیٹیگری میں پہلی بار پاکستان حصہ لے رہا تھا۔
گلگت بلتستان کے علاقے استور سے تعلق رکھنے والے قومی باکسر عثمان وزیر اس سے قبل پاکستان کے لیے اے بی ایف ایشین ٹائٹل اور ورلڈ باکسنگ کونسل مڈل ایسٹ ٹائٹل بھی جیت چکے ہیں۔
فتح کے بعد عثمان وزیر نے اپنے ویڈیو پیغام میں کہا کہ انھوں نے اس تاریخی فائٹ کے لیے بڑی تیاری کی تھی آج محنت کا صلہ مل گیا ہے اور وہ پاکستان کے پہلے باکسنگ ورلڈ چیمپئن بن گئے ہیں۔
انہوں نے کہا کہ اپنا ٹائٹل والدین کے نام کرتا ہوں جنہوں نے مجھے ہمیشہ سپورٹ کیا، میں اپنے کوچز کا بھی شکریہ ادا کرتا ہوں۔
عثمان وزیر کا کہنا تھا کہ میں نے یہ ٹائٹل بغیر حکومتی سپورٹ کے جیتا ہے، وزیراعظم پاکستان شہباز شریف سے اور گلگت بلتستان کے وزیراعلیٰ خالد خورشید سے اپیل کرتا ہوں کہ ملک میں موجود باکسنگ ٹیلنٹ کو سپورٹ کریں، اس طرح پاکستان کو مزید کئی عثمان وزیر مل سکتے ہیں۔
