Sehar Naseer 
ترکیہ اورشام میں امدادی سرگرمیوں میں حصہ لینے والے پاکستانی عملے کے اعزاز میں تقریب کا انعقاد کیا گیا۔
تقریب وزیر اعظم ہاوس پاکستان میں منعقد کی گئی۔
تقریب میں وزیر اعظم پاکستان سمیت دیگر سیاسی رہنماوں اور ریسکیو کے عملے نے شرکت کی۔
تقریب سے خطاب کرتے ہوئے وزیر اعظم پاکستان شہباز شریف کا کہنا تھا کہ پاکستان اور ترکیہ یک جان دو قالب ہیں، پاکستانی ریسکیو ٹیم نے ترک بہن بھائیوں کے دلوں میں جگہ بنائی ہے۔
انہوں نے کہا کہ پاکستان اپنے ترک اور شامی بہن بھائیوں کی ہر ممکن مدد جاری رکھے گا، معاشی مشکلات کے باوجود برادر ملکوں کے ساتھ تعاون جاری رکھیں گے، پورا پاکستان اپنے ترک اور شامی بھائیوں کے ساتھ ہے، پاکستان کی طرف سے اخوت اور ایثار کا پیغام پوری دنیا میں گیا ہے۔
تقریب میں وزیر اعظم پاکستان شہباز شریف نے ترکیہ اور شام کے زلزلہ سے متاثرہ علاقوں میں خدمات سرانجام دینے والی پاکستان کی سرچ اینڈ ریسکیو ٹیموں کے ارکان میں تعریفی اسناد بھی تقسیم کیں۔
