پاکستان بھر میں آج یو م پاکستان قومی و ملی جوش و جذبے سے منایا جا رہا ہے ۔دن کا آغاز توپوں کی سلامی سے ہوا، وفاقی دارالحکومت میں 31 جبکہ صوبائی دارالحکومتوں میں 21، 21 توپوں کی سلامی دی گئی۔
یوم پاکستان پر شاعر مشرق علامہ اقبال کے مزار پر گارڈز کی تبدیلی جبکہ ایوان صدر اسلام آباد میں مسلح افواج کی پریڈ کی پُروقار تقریب منعقد ہوگی۔
روایتی پریڈ محدود پیمانے پر کروانے کا فیصلہ کفایت شعاری پالیسی کے تحت کیا گیا۔
یوم پاکستان کے حوالے پاک فضائیہ نے اپنے خصوصی پیغام میں کہا ہے کہ یوم تجدیدِ عہد وفا کی مناسبت سے پاک فضائیہ کے شاہینوں نے پوری پاکستانی قوم کے جذبہ حب الوطنی کو سلام پیش کرتے ہوئے اس عزم کا اعادہ کیا ہے کہ پاک فضائیہ کا ہر جوان پاکستان کے دفاع، سلامتی اور خودمختاری کے تحفظ کیلئے ہمہ وقت تیار ہے اور ملک کی سالمیت کی خاطر کسی بھی قسم کی قربانی سے دریغ نہیں کرے گا۔
پاکستانی وزیر اعظم نے یوم پاکستان کے موقع پر کہا کہ یہ دن ہمیں 1940 میں واپس لے جاتا ہے جب برصغیر کے مسلمانوں نے ایک علیحدہ ملک کے قیام کی قرارداد منظور کی تھی۔ قائد اعظم کی قیادت میں برصغیر کے مسلمانوں کی سات سالوں کی تاریخ ساز جدوجہد نے اقبال کے خواب کو حقیقت میں بدلا ۔
زندہ قومیں مشکل حالات کا ڈٹ کت مقابلہ کرتی ہیں ۔ آج 23 مارچ کو آئیے ہم قوم کی خدمت کا جذبہ بیدار کریں۔
یاد رہے کہ 23 مارچ 1940 ء کو لاہور میں منظور ہونے والی قرارداد بعد ازاں آزادی کا پیش خیمہ ثابت ہوئی۔
