پاکستان سے ترکیہ، یورپ، برطانیہ اور امریکا جانے والے مسافروں کیلئے بڑی خوشخبری سامنے آئی ہے۔
پاکستان کی قومی ائیر لائن پی آئی اے نے 14نومبر سے ترکیہ کیلئے ہفتہ وار 6 پروازیں چلانے کا اعلان کردیا۔
کوڈ شیئرنگ معاہدے کے تحت ترکش ائیرلائنز پی آئی اے کے مسافروں کو استنبول سے آگے برطانیہ ،یورپ اور امریکا کے 28 شہروں تک پہنچائے گی۔
پاکستان کے وفاقی وزیر برائے شہری ہوا بازی خواجہ سعد رفیق نے ایک بیان میں کہا ہے کہ پاکستان اور ترکیہ کے مابین سفارتی تعلقات کی 75ویں سالگرہ پر پی آئی اے استنبول کیلئے اپنی پروازوں کا آغاز کر رہا ہے ، پی آئی اے 14 نومبر سے پاکستان سے ترکیہ کیلئے ہفتہ وار 6 پروازیں چلائے گی ۔
پی آئی اے اور ترکش ائیر لائنز کے درمیان کوڈ شیئرنگ معاہدے کے تحت پاکستان سے استنبول پہنچنے والے پی آئی اے کے مسافر استنبول سے آگے یورپ، برطانیہ اور امریکا کیلئے ترکش ائیرلائنز کے ذریعہ سفر کر سکیں گے۔
معاہدے کے تحت پی آئی اے کے مسافر استنبول سے یورپ، برطانیہ اور امریکا کے 28 شہروں تک رسائی حاصل کرسکیں گے۔
ابتدائی طور پر اسلام آباد سے 4 جبکہ لاہور سے 2 پروازیں بوئنگ 777 طیاروں کے ذریعے آپریٹ ہوں گی ،دوسرے مرحلے میں کراچی سے استنبول کی پروازیں بھی شروع کی جائیں گی ۔
