16 دسمبر 2014 میں پاکستان کے شہر پشاور کے آرمی پبلک اسکول (اے پی ایس) پر ہونے والے وحشیانہ دہشت گردانہ حملے میں شہید ہونے والے اسکول کے بچوں اور عملے کو خراج عقیدت پیش کرنے کے لیے انقرہ میں پاکستانی ایمبیسی کے زیر اہتمام ایک یادگاری تقریب کا انعقاد کیا گیا۔ سفیر پاکستان محمد سائرس سجاد قاضی، میونسپلٹی کے حکام اور پاکستانی سفارتخانے کے حکام نے تقریب میں شرکت کی۔
اس موقع پر تقریب سے خطاب کرتے ہوئے سفیر سائرس قاضی نے کہا کہ 16 دسمبر 2014 کے المناک دن اے پی ایس پشاور پر دہشت گردوں نے حملہ کیا جس میں 132 بچوں سمیت 140 سے زائد افراد شہید ہوئے۔ ان کا کہنا تھا کہ یہ قتل عام ہماری تاریخ کے سب سے المناک واقعات میں سے ایک ہے جس نے ہر پاکستانی کو صدمے اور غم میں مبتلا کر دیا ۔ سفیر نے اس بات کا اعادہ کیا کہ بحیثیت قوم ہم عہد کرتے ہیں کہ آئندہ کبھی بھی ایسے سانحات ہم پر نہیں آنے دیں گے۔
سفیر قاضی نے ترکی کے عوام کا شکریہ ادا کیا جنہوں نے مشکل کی اس گھڑی میں سب سے پہلے پاکستانی عوام کے ساتھ بھرپور یکجہتی کا اظہار کیا۔ انہوں نے خصوصی طور پر مونسپلٹی کے حکام کا شکریہ ادا کیا جنہوں نے شہد ہونے والے بچوں کے نام پر درخت لگایا اور غمزدہ خاندانوں کے ساتھ اظہار یکجہتی کی ۔ ان کا کہنا تھا کہ یہ ترکی میں ہمارے بچوں کی یاد کو ہمیشہ زندہ رکھے گی۔
سفیر نے میونسپلٹی کے اہلکاروں کے ساتھ اے پی ایس کے شہداء کی یادگار پر پھولوں کی چادر چڑھائی، جس کے بعد معصوم مرحومین کے لیے دعائیں کی گئیں ۔ علاوہ ازیں شرکاء نے یادگار پر پھول بھی چڑھائے۔
جب 16 دسمبر 2014 کو اے پی ایس پشاور پر گھناؤنا حملہ ہوا تو ترکی کے عوام اور قیادت نے پاکستان کی بھرپور حمایت کی اور یوم قومی سوگ کا اعلان کیا۔ مزید برآں، یکجہتی کے اظہار کے طور پر میونسپلٹی اور جسٹس اینڈ ڈویلپمنٹ (AK) پارٹی کے یوتھ ونگ کے اراکین نے انقرہ کے AK پارٹی میموریل فاریسٹ میں ہر ایک شہید کے لیے ایک درخت لگایا۔
