بیجنگ — چین کے جدید ترین طیارہ بردار جہاز فوجیان نے اپنی پہلی آزمائشی پرواز کامیابی کے ساتھ مکمل کرلی، جسے ملکی دفاعی صلاحیتوں میں ایک بڑا سنگِ میل قرار دیا جا رہا ہے۔
اس آزمائش میں فوجیان نے بیک وقت تین مختلف جنگی طیاروں کو فضا میں روانہ کیا۔ ان میں جدید اسٹیلتھ فائٹر J-35، اپ گریڈڈ ورژن J-15T اور ایئر وارنگ و کنٹرول سسٹم والا KJ-600 شامل تھے۔
فوجیان کی سب سے نمایاں خصوصیت اس کا نیا برقی لانچنگ سسٹم ہے، جو Electromagnetic Catapult Launching Technology پر مبنی ہے۔ یہ ٹیکنالوجی روایتی اسٹییم کیٹاپلٹ کے مقابلے میں زیادہ جدید اور مؤثر ہے، جس کے ذریعے جہاز کم وقت میں زیادہ طیارے فضا میں بھیجنے کی صلاحیت حاصل کرتا ہے۔
دفاعی ماہرین کے مطابق فوجیان کی رینج اور طاقت پرانے چینی طیارہ بردار جہازوں سے کہیں زیادہ ہے۔ اس پیش رفت کو چین کی بحریہ کے لیے ایک تاریخی کامیابی اور مستقبل کی فضائی برتری کا ثبوت قرار دیا جا رہا ہے۔
