پاکستانی فلم ساز کامران فیق کی مختصر فلم ’دی لاسٹ گلانس‘ نے بین الاقوامی سطح پر اہم کامیابی حاصل کر لی ہے۔ فلم نے امریکا کے 21ویں ٹیسویر فلم فیسٹیول میں بہترین مختصر فلم کا جیوری ایوارڈ جیتنے کے بعد آسکرز کی لانگ لسٹ میں جگہ بنا لی ہے۔ یہ فلمی میلہ 13 سے 18 اکتوبر تک امریکی شہر سیئٹل میں منعقد ہوا۔
کامران فیق کے مطابق، ہزاروں مختصر فلموں میں سے محدود تعداد ہی آسکرز کی دوڑ کے اس مرحلے تک پہنچ پاتی ہے۔ ان کا کہنا ہے کہ ٹیسویر فلم فیسٹیول سے آسکرز کے لیے کوالیفائی کرنے والی ’دی لاسٹ گلانس‘ واحد فلم ہے۔ تاہم، لانگ لسٹ میں شامل ہونے کا مطلب آسکرز کے لیے باضابطہ نامزدگی حاصل کرنا نہیں، بلکہ یہ فلم کو مقابلے کے اگلے مرحلے تک پہنچنے کا موقع فراہم کرتا ہے۔
مزید اپڈیٹس کیلئے وٹس ایپ چینل فالو کریں: چینل لنک
فلم کی کہانی ایک ایسے خاندان کے گرد گھومتی ہے جو علاقے میں پھیلے تشدد سے بچنے کے لیے رات کی تاریکی میں اپنا گاؤں چھوڑنے پر مجبور ہو جاتا ہے۔ فلم میں پاکستانی اداکار عدنان شاہ ٹیپو، عریج ایوب اور فہد ہاشمی نے کردار ادا کیے ہیں۔ کامران فیق نے فلم کی کہانی لکھنے کے ساتھ اس کی ہدایت کاری اور پروڈکشن بھی کی، جبکہ عمر پیرزادہ پروڈیوسر اور خالد سعید خان ایگزیکٹو پروڈیوسر ہیں۔ مائیک میک نامارا اور ارمینہ رانا خان نے شریک پروڈیوسرز کے طور پر کام کیا۔
’دی لاسٹ گلانس‘ اس سے قبل کینیڈا میں موزائیک انٹرنیشنل ساؤتھ ایشین فلم فیسٹیول میں بہترین بین الاقوامی مختصر فلم کا ایوارڈ بھی جیت چکی ہے۔ اس کے علاوہ، فلم کو لاس اینجلس میں ہونے والے ایشین ورلڈ فلم فیسٹیول کے مختصر فلموں کے پروگرام کے لیے آٹھ فائنلسٹ میں شامل کیا گیا۔ فلم ساز کے مطابق، اس انتخاب میں 50 سے زائد ایشیائی ممالک کی فلموں کے درمیان مقابلہ تھا۔
مزید اپڈیٹس کیلئے وٹس ایپ چینل فالو کریں: چینل لنک
کامران فیق نے یہ بھی بتایا کہ فلم کی ٹیم آسکرز کی آئندہ مہم کے لیے ایک آسکر نامزد اداکار کو ایگزیکٹو پروڈیوسر کے طور پر شامل کرنے کی کوشش کر رہی ہے، جو ایوارڈز کی مہم کے دوران فلم کی نمائندگی کر سکے۔
پاکستانی فلم کے لیے یہ پیش رفت مقامی فلم سازوں کی عالمی سطح پر بڑھتی ہوئی موجودگی کو اجاگر کرتی ہے۔ تاہم، آسکرز کی حتمی نامزدگی اور ایوارڈ تک رسائی کے لیے فلم کو مزید مراحل سے گزرنا ہوگا۔
