ترکیہ کے وزیر ٹرانسپورٹ و انفراسٹرکچر عبدالقادر اورال اوغلو نے کہا ہے کہ ایران سے متعلق حالیہ کشیدگی کے آغاز کے بعد سے ترک ملکیت کے 11 جہاز بحفاظت آبنائے ہرمز عبور کرکے خلیجی علاقے سے نکل چکے ہیں
وزیر نے اپنے بیان میں کہا کہ ترکیہ آبنائے ہرمز اور خلیجی خطے میں ہونے والی پیش رفت پر مسلسل نظر رکھے ہوئے ہے اور علاقے میں موجود جہازوں اور ترک شہریوں سے رابطے میں ہے۔
انہوں نے بتایا کہ 21 جون کو مزید دو جہازوں کی روانگی کے بعد جنگ کے آغاز سے اب تک بحفاظت گزرنے والے ترک ملکیت کے جہازوں کی تعداد 11 ہو گئی ہے۔
عبدالقادر اورال اوغلو کے مطابق اس وقت آبنائے ہرمز اور خلیجی پانیوں میں 7 ترک ملکیت کے جہاز موجود ہیں جن پر 177 ترک شہری خدمات انجام دے رہے ہیں ان جہازوں میں سے ایک ترکیہ کے پرچم تلے سفر کر رہا ہے۔
ترک وزیر نے واضح کیا کہ ترک حکومت اپنے شہریوں اور بحری جہازوں کی سلامتی یقینی بنانے کے لیے تمام ضروری اقدامات جاری رکھے ہوئے ہے۔
انہوں نے یاد دلایا کہ رواں سال اپریل میں ترک ملکیت کا خام تیل بردار جہاز "Ocean Thunder” بھی ترک وزارت خارجہ کی معاونت سے بحفاظت آبنائے ہرمز عبور کرنے میں کامیاب رہا تھا۔
ترک حکام کا کہنا ہے کہ خطے میں موجود تمام جہازوں اور ان کے عملے کی حفاظت اولین ترجیح ہے اور صورتحال پر مسلسل نظر رکھی جا رہی ہے۔
