پاکستان نے دفاعی میدان میں ایک اور اہم پیش رفت کرتے ہوئے مقامی طور پر تیار کردہ فتح-4 گراؤنڈ لانچڈ کروز میزائل کا کامیاب تربیتی تجربہ کر لیا ہے۔ آئی ایس پی آر کے مطابق یہ تجربہ آرمی راکٹ فورس کمانڈ کی جانب سے کیا گیا، جس کا مقصد افواج کی آپریشنل تیاری کو مزید مؤثر بنانا اور جدید نظاموں کی کارکردگی کو جانچنا تھا۔
آئی ایس پی آر کے جاری کردہ بیان میں کہا گیا ہے کہ فتح-4 کروز میزائل جدید ایویونکس اور جدید ترین نیویگیشنل ٹیکنالوجی سے لیس ہے، جو طویل فاصلے تک اہداف کو انتہائی درستگی کے ساتھ نشانہ بنانے کی صلاحیت رکھتا ہے۔
فوجی حکام کے مطابق اس تربیتی فائرنگ کے دوران میزائل میں شامل مختلف ذیلی نظاموں کے تکنیکی معیار اور کارکردگی کا کامیاب جائزہ لیا گیا۔ ان نظاموں کو میزائل کی درستگی، رفتار اور دفاعی بقا کی صلاحیت میں اضافے کے لیے تیار کیا گیا ہے۔
فتح-4 کے اس کامیاب تجربے کا مشاہدہ آرمی راکٹ فورس کمانڈ کے سینئر افسران کے علاوہ سائنسدانوں، انجینئرز اور متعلقہ دفاعی اداروں کے ماہرین نے بھی کیا۔ حکام کے مطابق تمام تکنیکی اہداف کامیابی سے حاصل کیے گئے۔
صدرِ پاکستان، وزیرِ اعظم، چیف آف آرمی اسٹاف، چیئرمین جوائنٹ چیفس آف اسٹاف کمیٹی، چیف آف نیول اسٹاف اور چیف آف ایئر اسٹاف نے کامیاب تجربے پر اطمینان کا اظہار کرتے ہوئے فتح سیریز کے میزائل پروگرام سے وابستہ سائنسدانوں، انجینئرز اور تکنیکی ٹیم کی مہارت اور عزم کو سراہا۔
فتح-4 میزائل پروگرام پاکستان کی مقامی دفاعی ٹیکنالوجی میں بڑھتی ہوئی خود انحصاری کا مظہر ہے، جبکہ اس قسم کے تجربات ملک کی دفاعی صلاحیت کو مزید مضبوط بنانے میں اہم کردار ادا کرتے ہیں۔
