ترکیہ کے شہر انطالیہ میں منعقدہ پانچویں انطالیہ ڈپلومیسی فورم کے موقع پر صدر رجب طیب ایردوان، قطر کے امیر شیخ تمیم بن حمد الثانی اور وزیراعظم پاکستان شہباز شریف کے درمیان اہم سہ فریقی ملاقات ہوئی، جس میں خطے کی تازہ صورتحال اور جاری امن کوششوں پر تفصیلی تبادلہ خیال کیا گیا۔
وزیراعظم آفس کے مطابق تینوں رہنماؤں نے حالیہ علاقائی پیش رفت اور امن کے لیے جاری سفارتی اقدامات پر اپنے خیالات کا اظہار کیا۔ ملاقات کے دوران غزہ اور فلسطین کی تشویشناک صورتحال بھی زیر بحث آئی، جبکہ اس بات پر اتفاق کیا گیا کہ خطے میں پائیدار امن اور استحکام کے لیے قریبی تعاون اور مسلسل رابطہ برقرار رکھا جائے گا۔
سہ فریقی نشست سے قبل وزیراعظم اور ترک صدر کے درمیان دو طرفہ ملاقات بھی ہوئی، جس میں باہمی تعلقات اور مشرقِ وسطیٰ کی بدلتی صورتحال پر گفتگو کی گئی۔ اس موقع پر ترک قیادت نے انطالیہ ڈپلومیسی فورم میں شرکت پر پاکستانی وفد کا خیرمقدم کیا اور خطے میں امن کے لیے پاکستان کی سفارتی کوششوں کو سراہتے ہوئے مکمل حمایت کا اعادہ کیا۔
پاکستانی قیادت نے فورم کے کامیاب انعقاد کو سراہتے ہوئے اسے عالمی سطح پر مکالمے اور تعاون کا ایک اہم پلیٹ فارم قرار دیا۔ دونوں ممالک نے اس بات پر زور دیا کہ موجودہ حالات میں امن کے لیے دستیاب مواقع سے مؤثر انداز میں فائدہ اٹھانا ضروری ہے تاکہ خطے میں دیرپا استحکام ممکن بنایا جا سکے۔
ملاقات کے دوران پاکستان اور ترکیہ کے درمیان تاریخی اور برادرانہ تعلقات کا اعادہ کیا گیا اور دو طرفہ روابط کی مثبت پیش رفت پر اطمینان کا اظہار کیا گیا۔ اس موقع پر یہ بھی طے پایا کہ اعلیٰ سطحی اسٹریٹجک تعاون کونسل کا آٹھواں اجلاس رواں سال انقرہ میں منعقد کیا جائے گا، جس کے ذریعے اقتصادی تعاون اور مشترکہ منصوبوں کو مزید فروغ دیا جائے گا۔
دورے کے دوران پاکستانی وفد نے مختلف عالمی رہنماؤں سے بھی غیر رسمی ملاقاتیں کیں، جن میں عالمی اور علاقائی صورتحال پر تبادلہ خیال کیا گیا۔ حکام کے مطابق ان ملاقاتوں کا ماحول خوشگوار رہا اور متعدد عالمی شخصیات نے خطے میں امن کے فروغ کے لیے پاکستان کے کردار کو مثبت قرار دیا۔
ادھر امریکی صدر کے مشیر برائے عرب و افریقی امور سے ہونے والی ملاقات میں بھی علاقائی استحکام، انسداد دہشت گردی اور اقتصادی تعاون کے موضوعات پر گفتگو کی گئی، جبکہ دونوں جانب سے دو طرفہ تعلقات کو مزید مضبوط بنانے کے عزم کا اظہار کیا گیا۔
تجزیہ کاروں کے مطابق انطالیہ ڈپلومیسی فورم میں ہونے والی یہ ملاقاتیں خطے میں سفارتی روابط کو مضبوط بنانے اور امن کے امکانات کو آگے بڑھانے کے حوالے سے اہم پیش رفت سمجھی جا رہی ہیں۔
